Prezıdenttíń jyl basyndaǵy dástúrlí sūhbaty Qazaqstandaǵy memlekettík-sayası dıskurstyń ornyqty úlgísíne aınaldy. Būl – Memleket basshysynyń el damuynyń strategıyalyq baǵytyn aıqyndap, qoǵamdyq sanaǵa negízgí qūndylyqtar men basymdyqtardy síńíruge baǵyttalǵan mańyzdy ıdeologıyalyq qūjat. Sūhbatta kóterílgen máseleler sayası tūraqtylyq, áleumettík jauapkershílík jáne ūlttyq bíregeılík konteksínde saralanyp, bılík pen qoǵam arasyndaǵy ózara senímdí nyǵaıtuǵa qyzmet etedí. Bıylǵy sūhbattyń «Turkistan» gazetínde jarıyalanuy ruhanı-mádenı keńístíktíń memlekettík ıdeologıyamen sabaqtastyǵyn kórsetíp, ūlttyq damu modelíníń mazmūndyq ózegín tereńdete tústí.
El Prezıdentí sóz basynda qazírgí būqaralyq aqparat qūraldarynyń, onyń íshínde gazet basylymdarynyń qoǵamdaǵy rólí artyp kele jatqanyn atap óttí. Memleket basshysy dástúrlí baspasózdí qoǵamdyq píkír qalyptastyrudyń, sondaı-aq adamnyń damuyna yqpal etetín kommunıkatsıyalyq qūraldyń bírí retínde baǵalady.
Sūhbat barysynda Prezıdent ótken jylǵa qorytyndy jasap, aldaǵy kezeńge arnalǵan basym josparlardy aıqyndady. Byltyr bastau alyp, qoǵamda keń talqyǵa túsken Salyq kodeksín jańartu máselesí, ekonomıkalyq reformalardyń mazmūny men baǵyty, auyl sharuashylyǵy salasyndaǵy ózektí problemalar ashyq aıtyldy. Jasandy ıntellektíní damytu baǵdarlamasy, sondaı-aq áleumettík qoldau júıesíníń keshegísí men búgíní jan-jaqty taldandy. Būl – eldíń tūraqty damuy men áleumettík ádílettílíktí qamtamasyz etuge baǵdarlanǵan memlekettík sayasattyń strategıyalyq negízín aıqyndaıdy.
Sonymen qatar, Qasym-Jomart Kemelūly 2025 jyldyń mańyzdy jetístígíníń bírí – Qazaqstannyń halyqaralyq arenadaǵy bedelíníń artqanyn atap óttí. Mysaly, Vashıngton, Máskeu, Beıjíń, Ankara, Abu-Dabı, Tashkent, Dushanbe, Bíshkek, Ashhabad jáne Tokıo qalalaryndaǵy resmı íssaparlardyń nátıjesín aıtty. Ásírese, BŪŪ Bas Assambleyasynyń mereıtoılyq sessıyasynda Qazaqstannyń osy ámbebap jahandyq ūıymdy reformalauǵa qatysty ūstanymyn egjeı-tegjeılí jetkízgeníne toqtaldy.
Prezıdenttíń bıylǵy sūhbaty dástúrlí formattan górí ashyq árí mazmūndy dıalog retínde órbídí. Memleket basshysy qoǵam nazaryn audarǵan máselelerge el múddesí tūrǵysynan baıypty kózqaras tanytty. Eshkímdí alalamaı, ár azamattyń eńbegín ádíl baǵalau – memleketshíl sananyń basty ólshemí ekenín atap ótken. Aldaǵy uaqytta írgelí konstıtutsıyalyq reformalarǵa qatysty referendum ótetínín jáne Ata zańǵa ózgeríster engízu baǵytynda júıelí jūmys júríp jatqanyn da habardar ettí.
Áńgíme barysynda el tarıhyna qatysty qoıylǵan sūraqqa jauap bere otyryp, Prezıdent: «Tarıh jūrtty daulastyratyn nemese jaulastyratyn taqyryp emes, kerísínshe, qoǵamdy ūıystyratyn qūndylyq boluǵa tıís. Aqıqatqa negízdelgen tarıh bízge ótkennen taǵylym alyp, kemshílíkterímízdí túzetu arqyly bolashaqqa senímmen qadam basudy úıretedí», – dedí. Osy tūrǵyda Prezıdent hákím Abaıdyń mūrasyn keńínen dárípteu mańyzdylyǵyn eskeríp, ūly oıshyldyń «Tolyq adam» ílímí men «Qara sózderíníń» búgíngí qoǵam úshín ózektílígín alǵa tartty.
Jalpy sūhbatta qamtylǵan memlekettík auqymdy taqyryptar óte kóp. Memleket basshysy «Zań men tártíp», «Taza Qazaqstan» baǵdarlamalary ayasyndaǵy jūmystardy kúsheıtu qajettígín, jastarǵa eńbekqorlyq, bílímge qūshtarlyq pen adamgershílík qūndylyqtardy keńínen nasıhattau keregíne de toqtalǵan. Sonymen qatar, tsıfrlyq dáuír talaptaryna saı ǵylym men bílím salasynda jasandy ıntellektíníń rólín arttyru qajettígíne nazar audardy.
Prezıdent 2026 jyly táuelsízdíktíń 35 jyldyǵy el tarıhyndaǵy mańyzdy data ekenín eske saldy. Onyń aıtuynsha, būl kezeń – ótken joldy saralap, bolashaqqa strategıyalyq josparlardy aıqyndaıtyn jauapty sát. Sondaı-aq, Memleket basshysy Qazaqstan bastamasymen Bíríkken Ūlttar Ūıymy 2026 jyldy «Halyqaralyq eríktíler jyly» dep jarıyalaǵanyn, būl sheshímníń «Taza Qazaqstan» ıdeyasymen tolyq úndesetínín jetkízdí.
Sóz sońynda, Prezıdent jeke ómírlík ūstanymdaryna da toqtalyp, jauapkershílík pen adaldyqty basty qaǵıda sanaıtynyn atap óttí. «Men – memleketshíl adammyn» degen sózí Memleket basshysynyń sayası bolmysy men qyzmetíníń mánín aıqyn kórsetetín túıíndí tūjyrym. Sondyqtan, Prezıdent sūhbaty sayası-ıdeologıyalyq ūlttyq bíregeılíktí nyǵaıtuǵa, qoǵamdyq senímdílíktí arttyruǵa jáne eldíń strategıyalyq damu basymdyqtaryn aıqyndauǵa baǵyttalǵan mańyzdy qūjat ekení anyq.