Ūstazdardyń bıylǵy jıyny «Adam kapıtaly, bílím, progress – Halyqtyq Konstıtutsıyanyń negízgí qūndylyqtary» taqyrybyna arnalyp otyr, dep habarlaıdy aqshamnews.kz tílshísí.
Alqaly jıynda sóz sóılegen Memleket basshysy Qasym-Jomart Toqaev ūstazdar qauymyn dástúrlí Tamyz konferentsıyasynyń ashyluymen qūttyqtady.
«Búgíngí jıynǵa Qazaqstannyń barlyq aımaǵynan ūlaǵatty ūstazdar arnaıy kelíp otyr. Myqty mūǵalím – sapaly ūlttyń tíregí, būl – naǵyz aqıqat. Búgín óte ūtymdy, mazmūndy bayandamalardy tyńdadyq, tıímdí píkírler men ūsynystar aıtyldy. Sóz sóılegen ūstazdarǵa, búkíl mūǵalímder qauymyna rızashylyǵymdy, íltıpatymdy bíldíremín. Tıístí mınıstrlík, jalpy Úkímet aıtylǵan máselelerdí únemí nazarda ūstauy kerek. Būl jūmysty asa mańyzdy strategıyalyq míndet dep túsínu qajet. Ūstazdy ūlyqtaǵan eldíń keleshegí jarqyn bolary aıdan anyq. Ūly Abaı 38-shí qara sózínde adamnyń adamdyǵy jaqsy ūstazdan bolatynyn aıtqan. Sízder jas buynǵa tereń bílím beríp, sanaly, ozyq oıly jáne otanshyl ūrpaq tárbıeleuge zor eńbek síńíríp júrsízder. Osylaısha, básekege qabílettí ūlt qalyptastyruǵa atsalysyp kelesízder», – dedí ol óz qūttyqtauynda.
Qasym-Jomart Toqaev Konstıtutsıyada tūńǵysh ret bílím salasyna aıryqsha mán berílgenín atap óttí.
«Bıylǵy Tamyz konferentsıyasy elímízdegí auqymdy ózgeríster kezeńíne tūspa-tūs keldí. Bárímíz bír el bolyp, túbegeılí reformalardy oıdaǵydaı júzege asyrdyq. Nauryz aıynda ótken jalpyūlttyq referendum nátıjesínde jańa Halyq Konstıtutsıyasy qabyldandy. Tūtas qoǵam qoldaǵan Ata zań bírínshí shílde kúní kúshíne endí. Būl – elímíz úshín mańyzy erekshe tarıhı oqıǵa. Bas qūjatta tūńǵysh ret bílím salasyna aıryqsha mán beríldí, yaǵnı adam kapıtalyn, bílímdí, ǵylymdy, ınnovatsıyany damytu elímízdíń strategıyalyq baǵyty retínde aıqyndaldy», – dedí Prezıdent.
Memleket basshysy óz sózínde qazírgí tańda búkíl bılík júıesín jáne qoǵamdyq ınstıtuttardy auqymdy jańǵyrtu jūmysy júríp jatqanyna toqtaldy:
«Osydan bírneshe kún būryn alǵashqy Qūryltaı saılauy óttí. Al keshe onyń nátıjelerí shyqty. Būl óte mańyzdy sayası nauqan, sayası ís-shara dep te aıtuǵa bolady, shyn mánínde, būryn-sońdy bolmaǵan joǵary deńgeıde ūıymdastyryldy. Osy íste Ortalyq saılau komıssıyasy úlken ról atqardy. Saılau úderísíne dūrys sheshímder, sonyń íshínde jasandy ıntellekt tehnologıyasy engízílude. Mūndaı ádís-tásílder nauqannyń sapasyn arttyra tústí. Sondaı-aq saılauǵa sheteldík baıqaushylar tarapynan da qyzyǵushylyq joǵary boldy. Halyqaralyq qauymdastyq saılau nátıjesín moıyndady, onyń ūlttyq zańnamaǵa jáne barlyq talaptarǵa saı ótkenín atap óttí. Men búgín Konstıtutsıyanyń 46-babyna sáıkes bírínshí shaqyrylymdaǵy Qūryltaıdyń bírínshí sessıyasyn shaqyru turaly Jarlyqqa qol qoıdym. Alqaly jıyn 28 tamyz kúní bolady. Oǵan deıín Qūryltaıǵa ótken partıyalar deputattardyń tízímín ázírleuge tıís».
Memleket basshysy Qūryltaı saılauynyń elímízdíń qoǵamdyq-sayası ómíríne úlken ózgerís ákelgenín aıryqsha atap óttí.
«Partıyalar ūsynǵan tízímge tájírıbesí mol túrlí mamandyq ıelerímen qatar, sayasatqa jańadan kelgen azamattar da endí. Olardyń qatarynda qabílettí jastar, solardyń íshínde Prezıdenttíń kadrlyq rezervíníń múshelerí bar. Jańa buyn ókílderí sayası nauqandy jandandyra túskení sózsíz. Halyqqa adal qyzmet etkísí keletín, jauapkershílíkten taısalmaıtyn, jańashyl adamdardyń báríne bírdeı múmkíndík beríldí. Túptep kelgende, būl – qalypty, yaǵnı evolyutsıyalyq úderís. Osy oraıda sayası partıyalardyń belsendílígín, olardyń ıdeologıyalyq ūstanymdaryn, kásíbı deńgeıín erekshe atap ótkím keledí. Sayası doda kezínde el bolashaǵyna tíkeleı yqpal etetín ūtymdy ūsynystar aıtyldy. Saılaushylar da būl jūmystan tys qalǵan joq, olar ár másele boıynsha óz píkírlerín ashyq bíldíríp otyrdy. Būl úgít-nasıhat kezínde bolǵan ūlttyq teledebattardan, aqparat alańyndaǵy ashyq píkírtalastardan anyq baıqaldy. Osylaısha, qoǵamda ózara qūrmet pen jauapkershílík jáne píkír aluandyǵy qūndylyqtary ornyǵyp jatyr, jańa sayası mádenıet qalyptasuda», – dedí Prezıdent.