Qalada 1 qyrkúıekke deıín 8 jańa bílím beru nysanyn jáne kúrdelí jóndeuden ótken taǵy 11 nysandy íske qosu josparlanǵan, dep habarlaıdy aqshamnews.kz tílshísí.
Jańa oqu jyly qarsańynda Almaty qalasyndaǵy bílím beru nysandarynyń daıyndyǵy pysyqtaluda. Qala ákímí Darhan Satybaldy oqu oryndarynyń jaǵdaıyn jeke baqylauyna alyp, audandardaǵy bírqatar nysandy aralap, jóndeu jūmystarynyń barysymen tanysty.
Jūmys sapary barysynda qala ákímí Almaly jáne Bostandyq audandaryndaǵy mektepter men mektepke deıíngí bílím beru ūıymdaryn tekserdí.
Almaly audanyndaǵy 576 orynǵa arnalǵan №124 mektep kúrdelí jóndeuden keıín jańa oqu jylynda oqushylardy qabyldauǵa daıyn. Jóndeu jūmystary bír jyl būryn bastalyp, qazírgí uaqytta tolyq ayaqtalǵan. Mekteptíń barlyq qajettí ınfraqūrylymy oqu protsesín bastauǵa ázír.
Bostandyq audanynda 550 oryndyq №60 mekteptíń daıyndyǵy qaraldy. Mūnda qoldanystaǵy ǵımaratqa jóndeu júrgízílíp, qosymsha korpus salynǵan. Júrgízílgen jūmystar nátıjesínde bílím beru nysanynyń jalpy aumaǵy 14 myń sharshy metrge deıín ūlǵaıdy.
Sondaı-aq Orbıta-4 shaǵynaudanyndaǵy №89 bóbekjaı-balabaqshadaǵy jóndeu jūmystary ayaqtaldy. 300 balaǵa arnalǵan mektepke deıíngí ūıym 12 topqa eseptelgen. Qazír nysandardy qajettí jıhazdarmen jáne qūral-jabdyqtarmen tolyqtyru jūmystary ayaqtaluǵa jaqyn.
«Jańa oqu jyly qarsańynda bílím beru nysandarynyń daıyndyǵyn jeke baqylauda ūstap, jaǵdaıyn tekserudí jalǵastyryp kelemín. Úsh nysan da daıyn. Qazírgí uaqytta olardy qajettí jabdyqtarmen tolyqtyru jūmystary ayaqtaluǵa jaqyn», – dedí Darhan Satybaldy.
Jalpy, Almatyda bílím beru ınfraqūrylymyn jańǵyrtu baǵytyndaǵy jūmystar júıelí túrde jalǵasyp jatyr. Qalada 1 qyrkúıekke deıín 8 jańa bílím beru nysanyn jáne kúrdelí jóndeuden ótken taǵy 11 nysandy íske qosu josparlanǵan.
Sonymen qatar belgílengen kesteden keshígíp jatqan bírneshe nysan bar. Qala basshysy olardyń árqaısysy jítí baqylauda ekenín atap ótíp, barlyq jūmystardy jaqyn arada tolyq ayaqtaudy tapsyrdy.
Jańa oqu jylyna daıyndyq ayasyndaǵy negízgí míndet – balalar úshín qauípsíz árí qolaıly bílím beru ortasyn qamtamasyz etíp, barlyq nysandy belgílengen merzímde paıdalanuǵa beru.