Prezıdent Qasym-Jomart Toqaev «Samūryq-Qazyna» qorynyń qyzmetí, negízgí óndírístík jáne qarjylyq kórsetkíshterdíń oryndaluy jáne írí ınfraqūrylymdyq jobalardyń júzege asyryluy turaly eseptí tyńdady.
Nūrlan Jaqypovtyń aıtuynsha, 2026 jyly Qor 3,2 trıllıon teńgeníń ınvestıtsıyalyq jobalaryn túıíndeudí josparlap otyr. Sonyń íshínde Moıynty – Qyzyljar, Darbaza – Maqtaaral temírjol jelílerín salu, Altynkól – Jetígen, Beıneu – Mańǵystau temírjol uchaskelerín jańǵyrtu, Qashaǵan ken ornyndaǵy gaz óńdeu zauytynyń qūrylysy, Almaty ekínshí jylu elektr ortalyǵyn jańǵyrtu, Túrkístan oblysynda bu-gaz qondyrǵysyn jáne gıbrıdtí elektr stantsıyasyn salu jobasy bar. Sonymen qatar Astanadaǵy derekterdí óńdeu ortalyǵynyń qūrylysy men Kaspıı teńízíníń tabanyna talshyqty-optıkalyq baılanys jelísín tóseu jūmystary ayaqtaluǵa jaqyn.
Prezıdentke Qordyń ınvestıtsıyalyq portfelí jónínde málímet beríldí. Atalǵan baǵytta 2027-2029 jyldary energetıka, mūnaı-gaz sektory, kólík jáne tsıfrlyq ınfraqūrylym salalary boıynsha 21 trıllıon teńgege 38 jobany íske asyru kózdelíp otyr.
Būdan bólek, Nūrlan Jaqypov Qordyń áleumettík jobalarynyń oryndaluy turaly bayandady. Medıtsınalyq jáne áleumettík nysandar saluǵa basymdyq berílíp, múgedektígí bar balalarǵa arnalǵan 55 ortalyq jáne 46 ınklyuzıya kabınetí ashylǵan, sporttyq jáne bílím beru ınfraqūrylymyn damytuǵa nazar audarylyp otyr.
Kezdesu sońynda Qasym-Jomart Toqaev Qor jūmysynyń negízgí baǵyttaryna qatysty bírqatar míndet júktedí.