Jetisý oblysy Alakól aýdanynyń prokýratýrasy bilim berý uıymdaryndaǵy qaýipti qaldyqtardy saqtaý, paıdalaný jáne kádege jaratý tártibine qatysty tekseris júrgizdi.
Taldaý barysynda birqatar mekemelerde sanıtarlyq talaptardyń óreskel buzylǵany belgili boldy, - dep habarlaıdy Aqshamnews.kz.
Qoldanystaǵy erejelerge sáıkes, isten shyqqan synapty shamdar arnaıy, oqýshylar kire almaıtyn bólmede saqtalýy tıis. Sondaı-aq olardy qarapaıym qoqys jáshikterine tastaýǵa qatań tyıym salynady (QR Densaýlyq saqtaý mınıstriniń 2021 jylǵy 5 tamyzdaǵy №76 buıryǵy).
Alaıda tekseris kezinde birneshe mektep pen memlekettik balabaqshada 436 dana isten shyqqan synapty lampanyń uzaq ýaqyt boıy qoımalarda, jertólelerde jáne sanıtarlyq talaptarda kózdelmegen basqa da oryndarda saqtalǵany anyqtaldy. Bul óz kezeginde oqýshylar men qyzmetkerlerdiń densaýlyǵyna naqty qaýip tóndirgen.
Prokýratýranyń qadaǵalaý aktisinen keıin barlyq zańbuzýshylyqtar joıylyp, qaýipti qaldyqtar belgilengen tártippen shyǵaryldy.
Nátıjesinde 3 458 azamattyń, sonyń ishinde 2 947 oqýshy men 511 qyzmetkerdiń quqyqtary qorǵaldy.