Almatydaǵy «Radıo úıí» ǵımaratynda «Shalqar» radıosynyń tolyq jóndeuden ótken jańa studıyasy saltanatty túrde ashyldy. Jańa studıyaǵa qazaqtyń tūńǵysh radıodıktory, Qazaq radıosynyń ardagerí, KSRO-nyń qūrmettí radısí, Qazaq KSR-níń eńbek síńírgen mádenıet qaıratkerí Mına Seıítovanyń esímí beríldí, – dep habarlaıdy aqshamnews.kz tílshísí.
Saltanatty sharaǵa radıo salasynyń ardagerlerí, qazírgí qyzmetkerlerí jáne būqaralyq aqparat qūraldarynyń ókílderí qatysty. Studıyanyń tūsaukeser rásímínde Ruslana Qūdaıbergenova, Sauyq Jaqanova, Altyn Imanbaeva syndy radıonyń bírqatar aǵa buyn ókílderí sóz sóılep, būl bastamanyń mańyzdylyǵyn atap óttí.
Jańa studıya «Shalqar» radıosynyń 60 jyldyq mereıtoıy ayasynda, talaı dıktorǵa tálím bergen ūstaz, radıo óneríníń kórnektí ókílí Mına Seıítovanyń jarqyn esímín ūlyqtau maqsatynda ashyldy.
Búgínnen bastap jańa studıyadan «Shalqar» radıosynyń tíkeleı efırdegí onnan astam baǵdarlamasy tyńdarmanǵa jol tartady. Zamanauı úlgíde jabdyqtalǵan studıya qabyrǵasyna Mına Seıítovanyń portretí ornalastyrylyp, ıntererde Astana men Almaty qalalarynyń kóríktí jerlerí beınelengen.
Mına Seıítova 1919 jyly 20 tamyzda Qostanaı oblysy Qarabalyq audanynyń №9 auylynda dúnıege kelgen. Ol 1934 jyly nebárí 15 jasynda Qazaq radıosyna qyzmetke qabyldandy.
Ekínshí dúnıejúzílík soǵys jyldary Máskeuden taraǵan resmı aqparattardy KSRO halyqtaryna Yurıı Levıtan jetkízse, qazaq dalasyna soǵys habarlaryn Mına Seıítovanyń úní jetkízdí.
Ol mıkrofon aldynda 44 jyl qyzmet etíp, radıo salasynda bírneshe buyn dıktor men mádenıet qaıratkerlerín tárbıeledí. Onyń shákírtteríníń qatarynda Qazaq KSR-íníń halyq ártísí Ánuarbek Baıjanbaev, KSRO halyq ártísí Ermek Serkebaev, Qazaq KSR-íníń halyq ártísí Zámzagúl Shárípova, aqyn Mūqaǵalı Maqataev, KSRO halyq ártísí Bıbígúl Tólegenova, dıktorlar Mambet Serjanov, Gennadıı Maryuhın, Qazaqstannyń eńbek síńírgen qaıratkerí Sauyq Jaqanova jáne basqa da tanymal tūlǵalar bar.
Qazaqtyń tūńǵysh dıktory Mına Seıítova eńbek jolynda bírneshe joǵary memlekettík nagradalarmen marapattalǵan. 1978 jyly qūrmettí demalysqa shyǵyp, 1987 jyly dúnıeden óttí.