Jetísu oblysynda TJD qyzmetkerí qūtqaru operatsıyasy kezínde qyzmettík míndetín atqaru barysynda qaza tapty, – dep habarlaıdy aqshamnews.kz tílshísí óńírlík Tótenshe jaǵdaılar departamentíne sílteme jasap.
Jetísu oblysy TJD málímetínshe, 7 nauryzda Altynkól kólínde mūz jarylǵan. Bólíngen mūzdyń ústínde balyqshy qalyp qoıyp, kóldíń ortasyna qaraı aǵyp ketken. Oqıǵa ornyna qūtqarushylar bardy.
"Qūtqaru operatsıyasy barysynda mūz taǵy jarylyp, saldarynan Panfılov audany TJ bólímí №11 órt sóndíru bólímíníń qarauyl bastyǵy, azamattyq qorǵau maıory Damır Taranov qaza tapty", - dep habarlady vedomstvo.
Tergeu júrgízílíp jatyr
Tótenshe jaǵdaılar vıtse-mınıstrí Kegen Tūrsynbaev Astanada ótken brıfıng barysynda būl qaıǵyly oqıǵa boıynsha qyzmettík tergeu júrgízílíp jatqanyn málímdedí.
"Sebepterín bízdíń qyzmetkerler anyqtaıdy, sodan keıín qandaı da bír zańbūzushylyq bolǵan-bolmaǵany belgílí bolady. Ol mūzdyń ústímen baryp adamdy qūtqarmaq bolǵan, mūz synyp ketken. Ókíníshke qaraı, zardap shekken adam da suǵa batyp kettí", - dedí ol.
Sondaı-aq Tūrsynbaev qaza tapqan qyzmetkerdíń otbasyna zańnamaǵa sáıkes kómek kórsetíletínín aıtty.
Qyzmetker turaly ne belgílí?
Damır Taranov 1994 jyly tuǵan. Ol azamattyq qorǵau júıesíndegí eńbek jolyn 2012 jyly bastap, Kókshetau tehnıkalyq ınstıtutyna oquǵa túsken. 2016 jyldan bastap órtke qarsy qyzmet organdarynda qyzmet atqaryp, Panfılov audany men Qapshaǵaıdyń (qazírgí Qonaev) órt sóndíru bólímderínde jauapty lauazymdarda jūmys ístegen.
"Sońǵy jyldary ol Jetísu oblysy Panfılov audanyndaǵy №11 órt sóndíru bólímínde qyzmet ettí, onda ózín tájírıbelí maman jáne áríptesterí qūrmetteıtín sauatty basshy retínde kórsettí. Ol antqa adal bolyp, azamattardyń qauípsízdígín qorǵau jolynda qyzmettík boryshyn sońyna deıín atqardy", - delíngen vedomstvo habarlamasynda.
Damır Taranovtyń artynda jūbaıy men ekí balasy qaldy.