Almaty tūrǵyndary men qala qonaqtary «MEGA Park» sauda-oıyn-sauyq ortalyǵynda ótken jańa Konstıtutsıya jobasyn qoldauǵa arnalǵan merekelík kontserttí tamashalady. Merekelík ís-sharany jańa Konstıtutsıyany qoldauǵa baǵyttalǵan qalalyq koalıtsıya ūıymdastyrdy.
Atalmysh sauda ortalyǵy halyq jıí bas qosatyn árí jastardyń súıíktí demalys orny. Sondyqtan bolar, merekelík kontserttíń tamashalauǵa kelgen kórermenníń qarasy qalyń boldy. Kúndelíktí sauda men demalu úshín kelgen tūrǵyndar būl joly sahnadan jandy dauysta án salǵan súıíktí ánshílerín kezdestírdí. Árıne, mūndaı formattaǵy ís-sharalar megapolıstíń qarbalas tírshílígínde sırek kezdesetíní anyq.
Degenmen, «Alatau» dástúrlí óner teatrynyń ónerpazdary men shyǵarmashylyq ūjymdary óz ónerlerín ūsynyp, án men kúı, sahnalyq qoıylym men zamanauı ınterpretatsıyalar arqyly kórermenníń ystyq yqylasyna bólendí. Árbír nomer tek estetıkalyq áser beríp qana qoımaı, qoǵamdy ortaq qūndylyqtar tóńíregínde ūıystyruǵa baǵyttaldy.
Ís-sharanyń negízgí maqsaty – jūrtshylyqqa merekelík kóńíl kúı syılaumen qatar, alda ótetín jańa Konstıtutsıya jobasyn qabyldau jóníndegí referendumnyń mańyzyn keńínen túsíndíru. Osyǵan oraı kontsertke qalalyq máslıhat deputaty Serík Esmatov bastaǵan jastar ūıymdarynyń ókílderí qatysyp, kórermendermen ashyq formatta píkír almasty. Būl – mádenı keńístíkte azamattyq dıalog ornatudyń tıímdí úlgísí. Kontsert ayasynda sóz alǵan tanymal ánshí Qazybek Ádíkeı mūndaı bastamalardyń qoǵamdyq máníne toqtala kele,
«Sauda-oıyn-sauyq ortalyǵy – halyq eń kóp jınalatyn oryn. Mūnda ártúrlí jastaǵy, típtí ártúrlí kózqarastaǵy adamdar keledí. Osyndaı ortada referendumnyń el bolashaǵy úshín qanshalyqty mańyzdy ekenín túsíndíru – azamattyq jauapkershílíktí arttyrady. Sondyqtan resmı jınalys nemese qūrǵaq aqparattan górí, dál osyndaı tásíl, yaǵnı óner men muzyka adamnyń sanasyna tez jetedí. Kórermen ózín úgít-nasıhattyń obektísí emes, ortaq oıdyń bír bólshegí retínde sezínedí. Būl – belsendí azamattyq pozıtsıyany qalyptastyrudaǵy mańyzdy faktor, – dese, ūıymdastyrushylar jaǵy da būl píkírdí qostap, mūndaı kontsertter aldaǵy uaqytta da qala ákímdígíníń qoldauymen ózge sauda-oıyn-sauyq ortalyqtarynda jalǵasyn tabatynyn jetkízdí.
Merekelík kontsertte belgílí ánshíler Bıbígúl Qılymhan, Abaı Begeı, Ínju Ánuarbek, Ermek Medenov jáne «Daro», «Baqaı» toptary qatysyp óner kórsettí. Atalmysh jıynnyń ūıymdastyrushylary da kópshílíkke rızashylyqtaryn bíldírdí. «Jastar ruhy» jastar qanaty Almaty qalalyq fılıalynyń tóraǵasy, jastar kóshbasshysy Dıdarbek Díldábek«Būl bastama jańa Konstıtutsıya jobasyn qoldaudyń qosymsha alańyna aınalyp, qoǵamdaǵy bírlík pen ózara túsínístíktí nyǵaıtuǵa yqpal etpek. MEGA Park-ta ótken merekelík kontsert – mádenıet pen azamattyq sananyń toǵysqan naqty úlgísí. Osyndaı formattaǵy ís-sharalar qoǵamdy beı-jaı qaldyrmaı, árbír azamatty el taǵdyryna ortaq jauapkershílíkpen qarauǵa jeteleıdí, – dep keshtí túıíndedí.
