Almatyda tūrǵyndarǵa tūrmystyq gaz jabdyqtaryn paıdalanu kezínde qauípsízdík talaptaryn qatań saqtau qajettígí turaly eskertíldí, – dep habarlaıdy aqshamnews.kz tílshísí.
Aqparatty qalalyq Kommunaldyq ınfraqūrylym jáne tūrǵyn úı ınspektsıyasy basqarmasynyń ókílderí tótenshe jaǵdaıdyń aldyn alu jáne halyqtyń qauípsízdígín arttyru maqsatynda taratyp otyr.
Tūrmystyq gaz jabdyqtary joǵary qauíp kózderíne jatady. Paıdalanu erejelerín būzu órtke, jarylysqa nemese kómírtegí totyǵymen ulanuǵa ákeluí múmkín. Sondyqtan qauípsízdík talaptaryn saqtau – árbír gaz tūtynushynyń míndetí.
Mamandardyń aıtuynsha, gazdyń shyǵuy men jarylystardyń basym bólígí gaz plıtalary men ballondardy dūrys paıdalanbaudan, sondaı-aq tehnıkalyq qyzmet kórsetu shartynyń bolmauynan tuyndaıdy. Gaz qūrylǵylarynyń jaramdy tehnıkalyq jaı-kúıín qamtamasyz etu – qauípsíz paıdalanudyń negízgí sharty.
Qazaqstan Respublıkasynyń zańnamasyna sáıkes gaz tūtynu júıeleríníń ıelerí olardyń tehnıkalyq jaramdylyǵy men qauípsízdígín qamtamasyz etuge, sondaı-aq arnauly ūıymdarmen tehnıkalyq qyzmet kórsetu turaly shart jasasuǵa míndettí.
S
Basqarma qalada tótenshe jaǵdaılardyń aldyn alu boıynsha júıelí profılaktıkalyq jūmystar júrgízílíp jatqanyn habarlady. Jyl saıyn Almatynyń Tótenshe jaǵdaılar departamentímen bírlesíp áleumettík ınfraqūrylym nysandarynda qysymmen jūmys ísteıtín gaz jabdyqtaryn, qazandyqtardy, ballondar men ydystardy qauípsíz paıdalanu boıynsha nasıhat aılyǵy ūıymdastyrylady.
Ís-sharalar barysynda bazarlar, sauda-oıyn-sauyq ortalyqtary, avtonomdy qazandyqtary bar tūrǵyn úı keshenderí, ákímshílík ǵımarattar, jeke úıler, jataqhanalar jáne qoǵamdyq tamaqtanu nysandary tekseríledí. Tekseruge TJD audandyq bólímshelerí, ákímdíkter, gaz tehnıkalyq qyzmetterí, polıtsıya departamentí jáne eríktíler tartylady.
Kóshpelí ís-sharalar kezínde tūrǵyndar men kásípkerlerge gaz tūtynu júıelerí men jabdyqtaryn qauípsíz paıdalanu talaptary, sondaı-aq zańnamada kózdelgen jauapkershílík túsíndíríledí.
Jylytu mausymy bastalar aldynda áleumettík osal toptardyń úıleríne kómírtegí totyǵy men tabıǵı gaz datchıkterí, sondaı-aq órt habarlaǵyshtary ornatylady. Sonymen qatar mamandar būryn ornatylǵan qūrylǵylardyń jaramdyǵyn tekseredí. Būl ís-sharalar qalada TJD, Polıtsıya departamentíníń ókílderímen jáne eríktílermen bírlesíp ótkízíledí.
Mamandar tūrǵyndarǵa negízgí qauípsízdík erejelerín eske salady. Gazdy qospas būryn mūrja men jeldetu arnalarynyń tartqyshyn tekseríp, gaz ıísíníń joqtyǵyna kóz jetkízu jáne bólmege taza aua kírgízu qajet. Gaz qūrylǵylary jūmys ístep tūrǵan kezde olardy qarausyz qaldyruǵa jáne gaz plıtasyn bólmení jylytu úshín paıdalanuǵa bolmaıdy.
Gaz ıísí anyqtalǵan jaǵdaıda gaz berudí dereu toqtatyp, terezeler men esíkterdí ashu, elektr qūraldaryn qospau jáne ashyq otty paıdalanbau qajet. Būdan keıín ǵımarattan shyǵyp, 104 nómírí boıynsha apattyq gaz qyzmetíne habarlasu kerek.
Mamandar gaz jabdyqtaryna tehnıkalyq qyzmet kórsetu men tekserudí tek arnauly ūıymdar júrgízuge tıís ekenín atap óttí. Osy talaptardy saqtau tótenshe jaǵdaıdyń aldyn aluǵa jáne tūrǵyndardyń qauípsízdígín qamtamasyz etuge múmkíndík beredí.
