Almatynyń mádenıet pen óner qaıratkerlerí qazaqstandyqtardy 15 nauryzda jańa konstıtutsıya jobasy boıynsha ótetín referendumǵa qatysuǵa shaqyrdy. Olardyń píkírínshe, eldíń negízgí zańy memleket pen qoǵamnyń bolashaǵyn aıqyndaıdy, sondyqtan ár azamat oǵan atsalysuy kerek, – dep habarlaıdy aqshamnews.kz tílshísí.
«Tan-Sholpan» halyqaralyq táuelsíz áıel suretshíler qorynyń prezıdentí, Qazaqstan Suretshíler odaǵynyń múshesí Jámıla Táken shyǵarmashylyq qauym ókílderí de jańa konstıtutsıya jobasyn mūqıyat qadaǵalap otyrǵanyn jáne mádenı salanyń árí qaraı damuyna úmít artatynyn atap óttí.
«Bíz konstıtutsıyany qoldaımyz. Būl elímíz úshín mańyzdy sayası qadam, óıtkení barlyǵymyz memleketímízdíń taǵdyry men bolashaǵyna alańdaımyz. Jańa Konstıtutsıya óz zańdylyǵyn kórsetíp, eldíń tūraqty damuyna múmkíndík beredí dep úmíttenemíz. Men, suretshí retínde, óner men mádenıet, sonyń íshínde beıneleu óneríne laıyqty kóńíl bólíngenín qalaımyn, óıtkení óner kóbínese memlekettíń bet-beınesí», — deıdí ol.
Jámıla Tákenníń aıtuynsha, suretshíler men óner qaıratkerleríníń úlesí eldíń damuy men mádenı mūrasyn qalyptastyruda mańyzdy ról atqarady.
«Suretshíler memlekettíń damuyna úlken úles qosady. Óner qoǵamnyń ruhanı jaǵdaıyn, tarıhy men qūndylyqtaryn kórsetedí. Sondyqtan mádenıet pen ónerdíń damuyna memleket múddelí. Bíz óner qaıratkerleríníń eńbegí laıyqty baǵalanatynyna úmíttenemíz», — dep qosty ol.
Áuezov atyndaǵy Ádebıet jáne óner ınstıtutynyń halyqaralyq qatynastar jáne álem ádebıetí bólímíníń meńgerushísí Svetlana Ananeva da aldaǵy referendumnyń el azamattary úshín mańyzdylyǵyn atap óttí.
«Elímíz jańa konstıtutsıyany talqylau men qabyldau jóníndegí referendumǵa daıyndalyp jatyr. Būl — memleketímízdíń negízgí zańy, balalarymyz ben bolashaq ūrpaǵymyz soǵan saı ómír súredí. Referendum — būl búkíl halyqtyq talqylau, ár adam qatysyp, píkír bíldíríp, ūsynys jasaı alady. Dauys berudíń nátıjesí aqparat qūraldarynda jarıyalanady», - deıdí.
Svetlana Ananevanyń aıtuynsha, konstıtutsıyanyń jańa nūsqasynda ǵylym, bílím, tárbıe men ekologıya máseleleríníń damuyna erekshe kóńíl bólíngen.
«Būl baǵyttar elímízdíń bolashaǵy úshín óte mańyzdy. Ár azamattyń shyǵarmashylyq erkíndígí men píkír bíldíruíne qaqy bar. Bárímíz referendumǵa baryp, eldíń órkendeuíne úles qosamyz», — dep túıíndedí.
