Búgin, 2 qarashada, Almatydaǵy bıik taýly «Medeý» muz aıdynynda jappaı syrǵanaý maýsymy resmı túrde ashyldy. Ashylýǵa bir saǵat qalǵanda-aq, esik mańynda balalar men eresekterdiń uzyn-sonar kezegi paıda boldy.
Alǵashqy kelýshiler úshin ashylý saltanaty uıymdastyryldy.
«Almatylyqtardyń, turaqty kelýshilerdiń pikiri men ótinishin eskerdik. İs-sharalardy uıymdastyrýǵa jaýapty barlyq qyzmet muz aıdynyn tolyq daıyndap úlgerdi, qajetti ınfraqurylym tolyǵymen daıyn, qala turǵyndarynyń ýaqytyn osynda ótkizetinine qýanyshtymyz», - dedi sport nysandary dıreksıasynyń ókili Oljas Ersheev.
Sanaýly mınýtta kúsh-qýat alyp, ýaqytyn paıdaly ótkizýge asyqqan adamdar aıdynǵa lyq toldy.
Sonymen qatar, kelýshiler úshin qazaqstandyq estrada juldyzdarynyń konserti uıymdastyryldy.
Jańa maýsymda qonaqtardy kúndelikti jappaı syrǵanaý, merekelik is-sharalar jáne sporttyq jarystar kútedi. Kelýshiler kónkıdi jalǵa alyp, demalys aımaǵyn paıdalana alady. Qonaqtardyń yńǵaıy úshin muz aıdyny aýmaǵynda jyldam tamaqtaný oryndary da uıymdastyrylady.