Aqtóbede klıenttíń kólígín rūqsatsyz míníp ketken avtoservıs sheberí sot úkímímen 4 jylǵa bas bostandyǵynan aıyryldy. Oqıǵa saldarynan kólíktí jóndeuge shamamen 8 mıllıon teńge qajet bolǵan, – dep habarlaıdy aqshamnews.kz tílshísí.
Ís materıaldaryna súıensek, Aqtóbe tūrǵyny 2024 jyly shyǵarylǵan Kia Sportage avtokólígín nesıege satyp alǵan. Keıín kólíktegí jeńíl zaqymdardy jóndetíp, syrlatpaq bolyp, tanysynyń keńesímen sheberge júgíngen. Jóndeu qūny 250 myń teńgege baǵalanyp, kólík ıesí keshkí uaqytta temír tūlparyn kíltímen bírge qaldyryp ketken. Sondaı-aq ol aldyn ala 150 myń teńge tólegen.
Alaıda arada bírneshe saǵat ótken soń sheber kólík ıesínen rūqsat almastan, klıenttíń avtokólígímen Alǵa qalasyna jóndeu men boyauǵa qajet qūral-jabdyq aluǵa ketken. Ol jaqqa aman jetkenímen, aua raıynyń qolaısyzdyǵy men joldyń jabyluyna baılanysty bírden qaıta almaǵan.
Keıín sheber dosymen bírge kólík íshínde alkogol íshken. Artynsha dúkenge barmaq bolyp, rólge otyrǵan sátte kólíktí basqara almaı, jol apatyna ūshyraǵan. Kólík ıesí būl jaǵdaı turaly tek kelesí kúní polıtsıyadan estígen.
Saraptamaǵa sáıkes, kólíktí qalpyna keltíru qūny shamamen 8 mıllıon teńgení qūraǵan. Aıyptalushy shyǵyndy tolyq óteı almaǵandyqtan, írí kólemde zalal keltíre otyryp, avtokólíktí zańsyz ıelenu baby boıynsha sotqa tartylǵan.
Sot barysynda 48 jastaǵy sheber kínásín tolyq moıyndaǵan. Úkím shyqqanǵa deıín ol tek 2 mıllıon teńge ótegen. Al jábírlenushí qalǵan 5 mıllıon teńgeden astam somany óndíríp berudí sūrap, sottan aıyptalushyny bas bostandyǵynan aıyrmaudy ótíngen.
Soǵan qaramastan, sot avtoservıs sheberín jalpy rejımdegí kolonıyada 4 jyl jazasyn óteuge úkím ettí.