Almatyda zań jaǵynan tegín kómek ūsynatyn joba íske qosylady, – dep habarlaıdy aqshamnews.kz tílshísí.\
Almaty tūrǵyndary «Zań men ádíldík – eldíń írgetasy» jobasy ayasynda zań jaǵynan tegín kómek ala alady: qalada zańgerlerdíń jedel toby jūmys ísteıdí, barlyq audanda kóshpelí keńes ótedí, qoǵamdyq oryndarda qūqyqtyq núkteler men jedel jelí de íske qosylady, sondaı-aq daıyn qūjat úlgílerí bar chat-bot ta jūmys ístemek. Óńírlík kommunıkatsıyalar qyzmetínde bastamanyń jetekshísí Aıgerím Qadyrqūlova osy jobanyń múmkíndígí turaly aıtyp berdí. Onyń aıtuynsha, negízgí maqsat — qūqyqtyq sauattylyqty arttyryp, zańǵa baǵynatyn mádenıet qalyptastyru eken.
«Bíz halyqtyń qūqyqtyq sauatyn arttyryp, zańǵa baǵynatyn mádenıet qalyptastyrudy maqsat etíp otyrmyz. Qazír qūqyqbūzushylyqtyń edáuír bólígín ádeıí emes, zańdy bílmegennen ístep jatyr. Adamdar óz qūqyǵyn túsíne bermeıdí, zań jaǵyna da kóbí olaqtau», — deıdí Aıgerím Qadyrqūlova.
Joba zań kómegín barynsha qoljetímdí etuge baǵyttalǵan. Qalada zańgerlík jedel toptar jūmys ísteıdí, barlyq audanda kóshpelí keńes ótkízíledí, sondaı-aq qoǵamdyq oryndar men aulalarda qūqyqtyq núkteler men tūrǵyndarmen kezdesu de ūıymdastyrmaqshy. Jedel jelí men chat-bot ta ashylǵan, onda ótínísh, shaǵym men basqa da qūjattyń úlgísín aluǵa bolady.
«Zańdy bíletín adam zań būzbaıdy. Hūqyǵy būzylǵanda ondaı adam ózín zańdy túrde qorǵaı alady. Qandaı árekettíń zańdy ekenín, kómek alu úshín qaıda júgínu kerektígín túsínu sanaly sheshím qabyldauǵa múmkíndík beredí», — dep atap óttí Aıgerím Qadyrqūlova.
Jobaǵa memlekettík organdar, Qoǵamdyq keńes múshelerí men zańgerlík qauymdastyq ókílderí qatysady. Mūndaı tásíl zańger men advokat keńesínen bastap, medıatsıyaǵa deıín jan-jaqty kómek kórsetuge múmkíndík beredí.
Zań jaǵynan tegín kómektí 8 (747) 104 76 69 telefony arqyly aluǵa bolady. Barlyq ótínísh tírkelíp, taldanady, būl eń jıí kezdesetín máselelerdí anyqtap, qaıtalama sūranystar sanyn azaıtuǵa múmkíndík bermek.
Sondaı-aq joba áleumettík jelídegí aqparattyq nauqandy, beınerolıkter men aǵartushylyq materıaldardy qamtıdy. Jobany íske asyru tūrǵyndardyń qūqyqtyq sauattylyǵyn arttyryp, qūqyqbūzushylyq deńgeıín tómendetíp, sanaly árí jauapty qoǵam qalyptastyruǵa yqpal etpek.