Mańǵystau oblysynda 16 qańtarǵa qaraǵan túní Aqtau – Beıneu baǵytynda qatynaǵan jolaushylar avtobusy jol apatyna ūshyrap, saldarynan tórt adam kóz jūmdy. Taǵy úsh jolaushy ártúrlí dárejedegí jaraqat alyp, auruhanaǵa jetkízíldí, - dep habarlaıdy aqshamnews.kz tílshísí.
2026 jylǵy 16 qańtar kúní shamamen saǵat 01:03-te KZ-11 "Dossor – Qūlsary – Beıneu – Saıótes – Shetpe – Jetíbaı – Aqtau" respublıkalyq mańyzy bar avtomobıl jolynyń 383-shaqyrymynda Yutong markaly jolaushylar avtobusynyń qatysuymen jol apaty tírkeldí.
Aldyn ala málímetterge sáıkes, avtobus Aqtaudan Beıneu auyly baǵytyna qaraı qozǵalyp kele jatqan. Júrgízushí kólíktí basqara almaı, nátıjesínde avtobus audarylyp ketken.
Jol-kólík oqıǵasy saldarynan oqıǵa ornynda tórt jolaushy qaza tauyp, úsh adam túrlí dárejedegí dene jaraqattarymen medıtsınalyq mekemelerge jetkízíldí. Avtobusta barlyǵy 50 jolaushy bolǵany anyqtaldy.
"Avtobus 2025 jylǵy 19 jeltoqsanda tehnıkalyq baıqaudan ótken jáne "CASPIAN TRANS CORPORATION" JShS-ne tıesílí. Apat bolǵan avtojol uchaskesí tehnıkalyq II sanatqa jatady. Jol jamylǵysy asfaltbeton, ení 9 metr. Tekseru barysynda jol jamylǵysynan aqaular anyqtalmaǵan, jol belgílerí bekítílgen dıslokatsıyaǵa sáıkes tolyq kólemde ornatylǵan. Oqıǵa táulíktíń qarańǵy uaqytynda bolǵan", - delíngen habarlamada.
Apat kezínde kólík qūralyn 1985 jyly tuǵan júrgízushí basqarǵan. Aldyn ala derekter boıynsha, jol-kólík oqıǵasy bolǵan jerden shamamen 200 shaqyrym būryn ekínshí júrgízushíge auysu júzege asyrylǵan.
Būl derek boıynsha Mańǵystau oblysy Polıtsıya departamentí jol-kólík oqıǵasynyń barlyq mán-jaıyn anyqtauǵa baǵyttalǵan keshendí tergeu sharalaryn júrgízíp jatyr. Tergeu nátıjesí boıynsha tıístí protsestík sheshím qabyldanatyn bolady.