Londonda Alatau City Investment Roundtable ınvestıtsıyalyq dóńgelek ústelí óttí. Ís-shara Alatau qalasyn damytuǵa halyqaralyq kapıtal tartuǵa baǵyttalǵan europalyq roud-shoudyń bastamasy boldy. Qazaqstandyq delegatsıyany Premer-mınıstrdíń orynbasary Qanat Bozymbaev basqardy.
Investıtsıyalyq dóńgelek ústelge JPMorgan Chase, AstraZeneca, BP jáne Brookfield Asset Management kompanıyalaryn qosa alǵanda, 70-ten astam kompanıya, ınvestıtsıyalyq qor, bank jáne saraptamalyq ūıymdardyń ókílderí qatysty. Qatysushylarǵa Alatau City-dí damytu tūjyrymdamasy, qalanyń ınvestıtsıyalyq múmkíndíkterí, perspektıvaly ınfraqūrylymdyq jobalar jáne olardy júzege asyruǵa sheteldík kapıtaldy tartu tetíkterí tanystyryldy.
Ís-sharada sóz sóılegen Qanat Bozymbaev Prezıdent Qasym-Jomart Toqaevtyń bastamasymen júzege asyrylyp jatqan Alatau City jobasynyń strategıyalyq mańyzyna toqtaldy.
«Roud-shoudy álemdegí jetekshí qarjy jáne qūqyq ortalyqtarynyń bírí – Londonda bastauymyz kezdeısoq emes. Ūlybrıtanıya – bízdíń strategıyalyq seríktesímíz. Alatau City – Prezıdent Qasym-Jomart Toqaevtyń bastamasymen júzege asyrylyp jatqan ūlttyq joba. Bíz Europa men Azıya arasyndaǵy ekonomıkalyq ózara ís-qımyldyń mańyzdy buynyna aınaluǵa tıís bıznes, qarjy, tehnologıya jáne logıstıka salalarynyń jańa ortalyǵyn qūryp jatyrmyz», – dedí Qanat Bozymbaev.
Dóńgelek ústel ayasynda «Alatau City Authority» arnaıy basqaru ūıymynyń bas atqarushy dırektory Álísher Ábdíqadyrov qalany damytudyń negízgí baǵyttaryn, onyń íshínde zamanauı ınjenerlík jáne kólík ınfraqūrylymyn, ónerkásíptík, ískerlík jáne logıstıkalyq aımaqtardy qūru josparlaryn tanystyrdy. Arup halyqaralyq ınjenerlík-konsaltıngtík kompanıyasy qatysushylardy keńístíktí josparlau jáne qalalyq ınfraqūrylymdy damytu tásílderímen tanystyrdy. Al «Báıterek» holdıngí ınvestıtsıyalyq jobalardy qarjylandyru qūraldaryn ūsyndy.
Alatau City-díń basty artyqshylyqtarynyń bírí – 2026 jylǵy 8 mamyrdaǵy Konstıtutsıyalyq zańda kózdelgen arnauly qūqyqtyq rejım. Ol Anglıya men Uels qūqyǵynyń qaǵıdattaryn qoldanu múmkíndígín, ınvestıtsıyalardy qorǵaudyń zamanauı tetíkterín jáne boljamdy ískerlík orta qalyptastyrudy kózdeıdí.
Norton Rose Fulbright, Reed Smith jáne Boies Schiller Flexner halyqaralyq zańgerlík kompanıyalarynyń qatysuymen ótken saraptamalyq sessıyada ınvestıtsıya tartudyń qūqyqtyq tetíkterí, memlekettík-jekeshelík áríptestík, halyqaralyq tórelík, tsıfrlyq aktıvterdí retteu jáne kommertsıyalyq daulardy sheshu máselelerí talqylandy. Sondaı-aq aǵylshyn qūqyǵynyń qaǵıdattaryn qoldanuǵa negízdelgen Alatau City-díń mamandandyrylǵan ınvestıtsıyalyq sotyn qūru perspektıvalary qarastyryldy.
Ískerlík baǵdarlama ayasynda London qor bırjasynyń, Brookfield Asset Management, Société Générale, J.P. Morgan jáne Europalyq qaıta qūru jáne damu bankíníń basshylyǵymen kelíssózder júrgízíldí. Taraptar ınstıtutsıonaldyq kapıtal tartu, jobalyq qarjylandyru qūraldaryn paıdalanu jáne halyqaralyq qarjy ūıymdaryn qalanyń energetıkalyq, kólík jáne ınjenerlík ınfraqūrylymyn damytuǵa qatystyru múmkíndíkterín qarastyrdy.
Ís-shara qorytyndysy boıynsha halyqaralyq seríktestermen jalpy ınvestıtsıyalyq áleuetí $1,3 mlrd qūraıtyn 9 kelísímge qol qoıyldy. Kelísímder ınfraqūrylymdyq jáne ınvestıtsıyalyq jobalardy qarjylandyru, bílím beru jáne densaulyq saqtau ınfraqūrylymyn damytu, sondaı-aq halyqaralyq yntymaqtastyqty keńeıtu baǵyttaryn qamtıdy.
Atap aıtqanda, University of Exeter, Brighton College jáne Repton Group qatysuymen bílím beru ūıymdaryn ashu jobalaryn pysyqtau kózdelgen. AstraZeneca jáne Crescent Meditours kompanıyalarymen yntymaqtastyq medıtsınalyq ınfraqūrylymdy damytu, ınvestıtsıya tartu jáne ǵylymı tájírıbe almasu máselelerín qamtıdy.
Qazírgí uaqytta Alatau City-díń ınvestıtsıyalyq portfelínde jalpy qūny shamamen $6,9 mlrd qūraıtyn 67 joba bar. Olardy júzege asyru nátıjesínde 55 myńǵa juyq jūmys ornyn ashu kózdelgen. Sonymen qatar qalada energıyamen, sumen jáne gazben jabdyqtau, káríz jelílerí men avtomobıl joldaryn damytuǵa baǵyttalǵan 28 ınfraqūrylymdyq joba boıynsha jūmys júrgízílude. Būl maqsatqa 35,3 mlrd teńge bólíngen.
Investıtsıyalyq roud-shou ayasynda Ūlybrıtanıyanyń memlekettík organdary, qarjy ınstıtuttary jáne strategıyalyq seríktester ókílderímen kelíssózder jalǵasady. Europalyq roud-shoudyń kelesí kezeńí Germanıyada ótedí.
