Joldauda belgílengen bastamalardy júzege asyruda ǵylymı jáne bílím beru salasy ókílderíníń jauapkershílígíne erekshe nazar audaryldy, dep habarlaıdy aqshamnews.kz tílshísí.
Almatyda Qazaqstan Respublıkasynyń Prezıdentí Qasym-Jomart Toqaevtyń Qazaqstan halqyna arnaǵan «Qazaqstannyń jańa tarıhı kezeńíndegí ózektí míndetterí» atty Joldauyn talqylauǵa arnalǵan saraptamalyq kezdesu óttí. Jıynnyń negízgí taqyryptary ūlttyq memlekettílíktí nyǵaıtu, qūqyqtyq sanany damytu, sondaı-aq eldíń strategıyalyq basymdyqtaryn íske asyrudaǵy ǵylym men bílímníń rólíne arnaldy.
«Joldaudyń basym baǵyttary: ūlttyq memlekettílík jáne qūqyqtyq sana» taqyrybyndaǵy ís-sharany Qazaqstan Respublıkasy Prezıdentíníń janyndaǵy Ūlttyq ǵylym akademıyasy men Qazaq ūlttyq qyzdar pedagogıkalyq unıversıtetí bírlesíp ūıymdastyrdy.
Talqylauǵa ǵylymı qauymdastyq ókílderí, unıversıtettíń professorlyq-oqytushylyq qūramy, Almaty qalasy ákímdígíníń ókílderí, sondaı-aq QyzPU Studenttík Qūryltaıynyń múshelerí qatysty.
Kezdesudí ashqan Qazaq ūlttyq qyzdar pedagogıkalyq unıversıtetíníń Basqarma tóraǵasy – rektory Beıbítqūl Kárímova Prezıdent Joldauynyń eldíń odan árí damuy úshín mańyzdylyǵyna toqtalyp, onda belgílengen bastamalardy júzege asyruda ǵylymı jáne bílím beru salasy ókílderíníń jauapkershílígíne erekshe nazar audardy.
«Prezıdent Joldauy Qazaqstannyń aldaǵy damu kezeńíne arnalǵan mańyzdy baǵdarlardy aıqyndaıdy. Alaıda belgílengen míndetterdíń tabysty júzege asuy tek memlekettík sheshímderge ǵana emes, qoǵamnyń, ǵylymı qauymdastyqtyń jáne bílím beru júıesíníń belsendí qatysuyna da baılanysty. Joǵary oqu oryndary qūqyqtyq mádenıetí joǵary, azamattyq jauapkershílígí qalyptasqan, ūlttyq qūndylyqtardy qūrmetteıtín jańa buyn ókílderín tárbıeleıtín mańyzdy alańǵa aınaluy tıís. Memlekettílígímízdíń tarıhı negízderín zerdeleu, zań ústemdígín nyǵaıtu jáne qoǵamdyq dıalogty damytu tárbıe men bílím beru jūmysynyń ajyramas bólígí boluy qajet», – dep atap óttí Beıbítqūl Kárímova.
Kezdesu barysynda qatysushylar Joldauda belgílengen eldíń áleumettík-ekonomıkalyq damuy, halyqtyń ál-auqatyn arttyru, tsıfrlyq transformatsıya jáne ınfraqūrylymdy jańǵyrtu baǵyttaryn qarastyrdy.
Atap aıtqanda, Memleket basshysy 2027 jyldy «Jalpyūlttyq auqymdy qūrylys jyly» dep jarıyalaudy ūsyndy. Sondaı-aq eń tómengí jalaqy mólsherín 85 myń teńgeden 110 myń teńgege deıín kóteru jónínde tapsyrma berdí.
Joldauda auyl sharuashylyǵy ónímderín tereń óńdeudí damytuǵa, agrarlyq sektorǵa jasandy ıntellekt tehnologıyalaryn engízuge jáne su resurstaryn ūtymdy paıdalanuǵa da aıryqsha mán berílgen. Sonymen qatar bílím beru júıesín jetíldíru, pedagogterdíń artyq júktemesín azaıtu, shaǵyn jáne mıkrobıznestí qolaıly jaǵdaılarmen qamtamasyz etu, salyq zańnamasyn jańartu jáne jańa Azamattyq kodekstí ázírleu máselelerí qamtyldy.
Saraptamalyq píkírtalas barysynda ūlttyq memlekettílík, Qūryltaı ınstıtutynyń tarıhı rólí, zań ústemdígín nyǵaıtu jáne azamattardyń qūqyqtyq sanasyn damytu máselelerí keńínen talqylandy. Ūlttyq ǵylym akademıyasynyń, ǵylymı-zertteu ınstıtuttarynyń, Almaty qalasy ákímdígíníń ókílderí men ǵalymdar atalǵan baǵyttardyń tūraqty árí jauapty qoǵam qalyptastyrudaǵy mańyzy jónínde píkír almasty.
Talqylaudyń praktıkalyq jalǵasy retínde memlekettík jáne qoǵam qaıratkerí Omarhan Óksíkbaev pen ǵalym-túrkolog Zárıpbaı Orazbaıdyń avtorlyǵymen jaryq kórgen «Qūryltaı fenomení» kítabynyń tūsaukeserí óttí. Basylymda Qūryltaı ınstıtutynyń tarıhı jáne qoǵamdyq-sayası qyrlary qamtylǵan.
Sondaı-aq qatysushylarǵa zańger, PhD doktory Baqytjan Saparovtyń avtorlyǵymen ázírlengen «Konstıtutsıya saqshylary» atty tanymdyq komıks tanystyryldy. Basylym konstıtutsıyalyq qūndylyqtardy keńínen nasıhattauǵa jáne, ásírese, jastar arasynda qūqyqtyq sauattylyqty arttyruǵa baǵyttalǵan.
Kezdesu el bolashaǵy, ūlttyq dástúrler sabaqtastyǵy jáne qazírgí qoǵamdyq ózgeríster jaǵdaıynda qūqyqtyq mádenıettíń mańyzy jóníndegí ashyq saraptamalyq dıalog alańyna aınaldy.