Qalanyń múmkíndíkterí Panamada ótken ICCA Congress 2026 jıynynda tanystyryldy, dep habarlaıdy aqshamnews.kz tílshísí.
Almaty ískerlík turızmníń halyqaralyq naryǵyndaǵy ornyn nyǵaıtyp, írí kongres, forum men konferentsıya ótkízu múmkíndígín keńeıtíp keledí. 8-11 qarasha aralyǵynda Panama-Sıtıde ótken Halyqaralyq kongrester men konventsıyalar qauymdastyǵynyń (ICCA) 65-shí jyl saıynǵy kongresínde Almaty Tourism Bureau ókílderí megapolıstíń turıstík jáne ískerlík ınfraqūrylymyn tanystyrdy. Būl turaly Almatynyń Turızm basqarmasynyń ókílderí aıtty.
Bıylǵy kongreske 80-nen astam elden 1 myńnan astam maman jáne 100-den astam halyqaralyq qauymdastyqtyń ókílderí qatysty. Mūndaı basqosular halyqaralyq ís-sharalardy qaı qalada ótkízu jónínde sheshím qabyldaıtyn ūıymdarmen tíkeleı baılanys ornatuǵa múmkíndík beredí.
Almaty Tourism Bureau mamandary Visit Almaty brendímen sheteldík seríktestermen kezdesíp, halyqaralyq konferentsıyalar men forumdardy Almatyda ótkízu múmkíndíkterín tanystyruda. Ásírese, medıtsına, ǵylym, tehnologıya, bıznes jáne ınnovatsıya salalaryndaǵy ís-sharalardy qalaǵa tartuǵa basymdyq berílgen.
2025 jyldyń qorytyndysy boıynsha Almaty ICCA álemdík reıtıngínde bírden 10 satyǵa joǵarylady. Qalada ótken halyqaralyq ís-sharalardyń jalpy ekonomıkalyq áserí shamamen 2,94 mln AQSh dollary boldy. Ár ís-shara qala ekonomıkasyna orta eseppen 327 myń dollar kírís ákelgen. Al halyqaralyq qatysushylardyń árqaısysy orta eseppen 1 210 dollar jūmsaǵan.
2027 jyly halyqaralyq kásíbı qauymdastyqtarmen baılanysty nyǵaıtyp, Almatyda ótkízuge bolatyn írí ís-sharalardy anyqtau jáne olardy qalada ūıymdastyruǵa ótíním beru josparlanyp otyr.
Jańa ískerlík ís-sharalardy tartu sheteldík qonaqtar sanyn arttyryp, qonaq úıler men meıramhanalardyń qyzmetíne sūranysty kóbeıtuge, sondaı-aq qazaqstandyq jáne sheteldík mamandar arasyndaǵy kásíbı baılanysty keńeıtuge jol ashady.