Almaty qalasynyń Medeu audanynda ornalasqan №5 Oqushylar úıínde «Kúnshuaq» jazǵy oıyn-sauyq alańy ashyldy, – dep habarlaıdy aqshamnews.kz tílshísí.
Ís-sharaǵa audandyq bílím beru ūıymdarynyń ókílderí, ata-analar men balalar qatysty.
Merekelík keshte sóz alǵan Medeu audandyq bílím bólímíníń ádískerí Nazym Sarsebaeva jaz mezgílínde balalardyń bos uaqytyn mazmūndy árí tıímdí ūıymdastyrudyń mańyzdylyǵyna toqtalyp, «Kúnshuaq» jazǵy alańy olardyń shyǵarmashylyq qabíletterín shyńdap, tūlǵalyq damuyna serpín beretín erekshe orta bolatynyn atap óttí.
– Qymbatty balalar! Sízderdí kópten kútken jazǵy demalystyń bastaluymen shyn júrekten qūttyqtaımyn! Aldaǵy jazǵy lager kúnderí sízderge jarqyn áserler men ūmytylmas estelíkter syılaıtynyna senímdímín. Osy uaqytty paıdaly ótkízíp, jańa oqu jylyna kúsh-quat pen shabyt jınańyzdar. Sízder –talantymen tanylyp, shyǵarmashylyǵymen daralanǵan daryndy balalarsyzdar. Sondyqtan búgíngí qūrmet te, maqtau men madaq ta ózderíńízge arnalady. Bíz árqaısyńyzdyń jetístíkteríńízben maqtanamyz! Jaz aılary shattyqqa, qyzyqty oqıǵalarǵa, jańa dostar men jarqyn jetístíkterge toly bolsyn! Merekeleríńíz qūtty bolsyn! – dedí ol.
№5 Oqushylar úıíníń dırektory Saıragúl Shaǵataevanyń málímetínshe, bıyl jazǵy lagerge 1000-ǵa juyq bala qatysady. Balalarmen 20 kásíbı pedagog jūmys júrgízedí.
– Búgín bíz Balalardy qorǵau kúní men jazǵy lagerdíń ashylu saltanatyn qatar ótkízíp otyrmyz. Mūnda balalar tańǵy saǵat 8:30-dan 13:00-ge deıín ártúrlí úıírmelerge qatysyp, ózderíníń qyzyǵushylyqtary men shyǵarmashylyq qabíletterín damyta alady. Lager baǵdarlamasynda dombyra, án-bı, toǵyzqūmalaq, shahmat, suret salu jáne qolóner úıírmelerí qarastyrylǵan. Míne, qazír balalar osy úıírmelerde úırengen ónerlerín kópshílík nazaryna ūsynyp jatyr. Ótken jyly lager jūmysyna 1500 bala qatysqan bolatyn, – deıdí basshy.
«Qolóner» sheber qoldar» úıírmesíníń jetekshísí Jūldyzaı Qasen 7–14 jas aralyǵyndaǵy qyz balalarǵa jíp pen matadan túrlí būıymdar jasaudy úıretedí.
– Úıírmede tórt top jūmys ísteıdí. Qyzdarymyz óte yntaly árí ıkemdí. Mūndaı sabaqtar balalardyń ūsaq motorıkasyn jetíldíríp, shyǵarmashylyq oılau qabíletín damytady. Bolashaqta olardyń jūmystarynan kórme ūıymdastyrudy josparlap otyrmyz, – deıdí úıírme jetekshísí.
Kóp balanyń íshínen «Shahmat patshalyǵy» úıírmesíne qatysatyn, 6-synypty bıyl ayaqtaǵan Erkín Mūhamedamındí sózge tarttyq:
– Shahmatqa kíshkentaı kezímnen qyzyǵamyn. Úıírmege qatysyp júrgeníme bír jyl boldy. Qalalyq jarystarǵa qatysyp, júldelí oryndar alyp júrmín. Úıde de jattyǵamyn. Mūnda kelíp bílímím men tájírıbemdí jetíldíremín. Shahmatta ár qadamyńdy oılanyp jasasań, jeńíske jetuge múmkíndík mol, – deıdí ol.
Jazǵy lagerdíń ashylu saltanatynda merekelík kóńíl-kúı bírden sezíldí. Ásem bezendírílgen alańda shahmat oınap otyrǵan balalar, dombyra tartyp, bı bılep júrgen ónerpazdar, suret salyp jatqan jas suretshíler men qoldaryna ıne-jíp ūstap, qolónermen aınalysqan búldírshínder óte kóp boldy. Balalarynyń júzderíndegí quanyshty kóruge kelgen ata-analar da jeterlík. Qyzyqty oıyndar ūıymdastyryp, balalarǵa erekshe kóńíl-kúı syılaǵan anımatorlar da merekeníń shyraıyn asha tústí.
Ís-shara barysynda Medeu audany Bílím bólímíníń basshysy Aqnūr Orazhanqyzy lager jūmysyna belsene qatysyp, jaqsy nátıje kórsetken mamandarǵa Alǵys hattar tabystady.
Ūıymdastyrushylardyń aıtuynsha, «Kúnshuaq» jazǵy oıyn-sauyq alańynyń baǵdarlamasyna sporttyq jarystar, tanymdyq ís-sharalar, shyǵarmashylyq sheberhanalar men qyzyqty ekskursıyalar qarastyrylǵan.
Dana SADYRQAN