Qazaqstannyń Qylmystyq íster jóníndegí kassatsıyalyq soty Abaı oblysynda 6 jylǵa sottalǵan áıeldíń ísín qaıta qarap, jaza merzímíníń óteluíne baılanysty ony sot zalynan bosatty, – dep habarlaıdy aqshamnews.kz tílshísí.
Sot málímetínshe, oqıǵa 2024 jyldyń shílde aıynda bolǵan. Ekí er adam janjaldasyp jatqan sátte, olardyń bírí áıeldíń kúıeuín tūnshyqtyrǵan. Kúıeuín qūtqaruǵa tyrysqan áıel qolyna aǵashtyń synyǵyn alyp, shabuyl jasaǵan er adamdy moıyn tūsynan bír ret ūrǵan. Saldarynan ol alǵan jaraqatynan kóz jūmǵan.
Alǵashqy sot ınstantsıyasy áıeldí Qylmystyq kodekstíń 106-baby 3-bólígí boıynsha kínálí dep tanyp, 6 jylǵa bas bostandyǵynan aıyrǵan. Sondaı-aq ony marqūmnyń tuystaryna 3 mln teńge kólemínde ótemaqy tóleuge míndettegen. Būl sheshímdí oblystyq sot ta ózgeríssíz qaldyrǵan.
Alaıda kassatsıyalyq sot áıeldíń áreketí kúıeuín qorǵau maqsatynda jasalǵanyn eskerdí. Sonymen bírge sot onyń qorǵanu shegínen asyp ketkenín de atap óttí. Ístí qaıta saralau kezínde áıeldíń jasaǵan ísíne ókínísh bíldíruí, kámeletke tolmaǵan balasynyń boluy, III toptaǵy múgedektígí jáne oqıǵaǵa jábírlenushíníń óz qūqyqqa qaıshy áreketí sebep bolǵany nazarǵa alynǵan.
Nátıjesínde sot áıeldíń áreketín Qylmystyq kodekstíń 112-baby 2-bólígíne qaıta saralap, oǵan 1 jyl bas bostandyǵynan aıyru jazasyn taǵaıyndady. Būl merzím kassatsıyalyq qarau sátíne deıín tolyq ótelgendíkten, áıel sot zalynan bosatyldy.