Qazaqstan men Orta Azıanyń birqatar tarıhı muralary IýNESKO tizimine enedi
Búgin QR Mádenıet jáne sport mınıstri Aqtoty Raıymqulova IýNESKO-nyń Almatydaǵy búrosynyń dırektory jáne Qazaqstan, Qyrǵyzstan jáne Ózbekstandaǵy IýNESKO ókili Krısta Pıkkatpen kezdesti, dep habarlady Almaty-akshamy.kz. QR Mádenıet jáne sport mınıstrliginiń saıtyna silteme jasap.
Kezdesý jyly, dostyq ráýishte ótti. Aqtoty Raıymqulova Krısta Pıkkatqa jáne IýNESKO-nyń klasterlik búrosyna mádenı murany, dástúrli qundylyqtar men adamzattyń bilimin jetildirip, arttyrýǵa baǵyttalǵan semınarlar, trenıńter men dárister ótkizgeni úshin alǵys aıtty.
Klasterlik búro uıymdastyratyn is-sharalar tarıhı-mádenı murany saqtaýda bilim men tájirıbe jınaýǵa, berýge, taratýǵa jáne almasýǵa múmkindik beredi.
Qazaqstannyń IýNESKO isteri jónindegi ulttyq komısıasy Qazaqstan basshylyǵynyń «Jibek joly: Ferǵana-Syrdarıa dálizi» serıalyq transulttyq nomınasıasyn IýNESKO-nyń Búkilálemdik Muralar Tizimine birlesip daıyndaý jáne ilgeriletý máselesin maquldaǵan bolatyn.
Alaıda, koronavırýs pandemıasyna jáne shekaralardyń jabylýyna baılanysty bul jumys birshama baıaýlap qalǵan edi.
Qazirgi ýaqytta Qazaqstan Respýblıkasynyń Mádenıet jáne sport mınıstrligi, Qyrǵyz Respýblıkasynyń Mádenıet, aqparat, Sport jáne jastar saıasaty mınıstrligi, Tájikstan Respýblıkasynyń Mádenıet mınıstrligi jáne Ózbekstan Respýblıkasynyń Mádenıet mınıstrligi arasynda birlesken daıyndyq jáne ilgeriletý boıynsha memorandým jobasy ázirlendi.
Memorandým transulttyq nomınasıany daıyndaý jónindegi Hatshylyqty qurý jolymen kúsh biriktirýdi kózdeıdi, onyń fýnksıalary Qazaqstan Respýblıkasy Mádenıet jáne sport mınıstrligine júktelgen.
Sondaı-aq arnaıy jumys toby qurylyp, onyń quramyna barlyq 4 eldiń ókilderi kiredi, olar serıalyq transulttyq nomınasıany tikeleı daıyndaýmen jáne ilgeriletýmen aınalysady.
Memorandým jobasyn qyrǵyz, tájik jáne ózbek taraptary aldyn ala kelisip, maquldaǵan. Taıaý ýaqytta memorandýmǵa resmı qol qoıý rásimi ótedi dep kútilýde.
Qazaqstan tarapynan jyl saıyn serıalyq transulttyq nomınasıany ilgeriletý jónindegi uıymdastyrý is-sharalaryna qarajat bólinip keledi.
Budan ári Aqtoty Raıymqulova Krısta Pıkkatty osy baǵytta júrgizilip jatqan naqty jumys týraly habardar etti.
QR Mádenıet jáne sport mınıstrligi Dúnıejúzilik mura komıtetin «Eski Túrkistan» arheologıalyq parkiniń josparyndaǵy keıbir ózgerister týraly habardar etti. Túrkistan rýhanı-mádenı ortalyǵynyń birinshi kezeńiniń jeti jobasy týraly aqparatty jańartty. Búgingi tańda amfıteatr, Neke saraıy, shyǵys monshasy, sýburqaq, Kúltóbe qalashyǵy men arheologıalyq parkin qurý; Qoja Ahmet Iasaýı murajaıy, oblystyq ǵylymı-ámbebap kitaphana jáne «Uly dala eli» ortalyǵy qurylysy aıaqtaldy. Sondaı-aq qazaq drama teatryn qamtıtyn ekinshi kezeńdegi jobalar - saýda ortalyǵy, «Hampton» qonaq úıi jáne Shyǵys bazary-Kerýen-saraı, sondaı-aq t.b bar.
Dúnıejúzilik mura komıtetiniń keńeıtilgen 44-shi sesıasynyń aldyn ala sheshiminiń jobasy belgili, ondaǵy usynystarmen Qazaqstan kelisip otyr.
2022 jylǵy 1 aqpanǵa deıingi merzimde biz Dúnıejúzilik mura ortalyǵyna obektiniń saqtalý jaı-kúıi týraly jáne 44 - sesıa sheshiminiń oryndalýy týraly jańartylǵan esepti Dúnıejúzilik mura komıtetiniń 2022 jylǵy 45-sessıasynda qaraýy úshin usynatyn bolamyz.
Sonymen qatar, kezekti sesıanyń qorytyndysy boıynsha biz bolashaq qurylys nysanyn qaýip-qatersiz qalaı qorǵaýǵa bolatyndyǵyn qarastyrý úshin Dúnıejúzilik mura ortalyǵynyń/ICOMOS reaktıvti monıtorıńiniń birlesken mısıasyn kútemiz», - dedi mınıstr.
Sonymen qatar QR Mádenıet jáne sport mınıstri Krısta Pıkkatqa qazaqstandyq taraptan mısıanyń jumysyna barlyq qajetti qoldaý kórsetiletinin aıtty.