Alǵashqy reıspen 314 otandasymyz Almatyǵa jettí, – dep habarlaıdy aqshamnews.kz tílshísí.
Áskerı qaqtyǵystarǵa baılanysty Tayau-Shyǵys elderínde qalyp qoıǵan Qazaqstan azamattaryn qauípsíz evakuatsıyalau sáttí júzege asuda. Alǵashqy reıspen 314 otandasymyz Almatyǵa jettí. Qazaqstan aımaq elderíníń arasynda alǵashqy bolyp óz azamattaryn elge qauípsíz jetkízdí.
Búgín saǵat 15:09-da SCAT áue kompanıyasynyń Almaty – Maskat – Almaty baǵyty boıynsha reısí Almaty áuejaıyna sáttí qondy. Dubaıdan evakuatsıyalanǵan jolaushylardy taǵatsyzdana kútíp tūrǵan tuǵan-tuystary men jaqyndary eríksíz kóz jastaryna erík berdí.
Bíríkken Arab Ámírlíkterínen elge qaıtarylǵan otandastarymyz Qazaqstan Prezıdentí men Úkímetíne alǵystaryn bíldírdí. Olardyń aıtuynsha, geosayası turbulenttílík kezeńínde memleket tarapynan jedel sheshím qabyldanyp, qauíptí aımaqtaǵy azamattar qarausyz qalmaǵan. «Prezıdent pen Úkímet qıyn sátte bízdí jalǵyz qaldyrmady», – dedí elge oralǵan azamattar.
«Otanymyzdyń qamqorlyǵy bízge úlken demeu boldy», – deıdí Shymkent qalasynyń tūrǵyny Karıma Murafıeva. Ol áuejaıda tūryp:
– Sırenalardyń dauysy, jarylystar, úıge jete alamyz ba degen alań – barlyǵy qatty áser ettí. Qazaqstan Respublıkasy Syrtqy íster mınıstrlígíníń qyzmetkerlerí bízben baılanysqa shyqqan sátten bastap sením paıda boldy. Kóptegen ózge el azamattary álí de sol jaqta qalyp qoıǵanyn kórdík. Qazaqstannyń óz azamattaryna degen qamqorlyǵyn sezínu – úlken demeu boldy. Dıplomattarymyzdyń janashyrlyǵynyń arqasynda Omanǵa jóneltílu turaly nūsqaudy sabyrmen kúttík. Keıín kídíríster bolsa da, elge aman jettík. Osyndaı sátte beıbít ómírdíń, tuǵan jerdíń qadírín túsínedí ekensíń. Bíz bastan ótkergen jaǵdaıdy eshbír otandasyma tílemeımín, – degen aqjarma píkírín bólístí.
Semeı qalasynyń tūrǵyny Janat Tóleubekov te jūbaıy jáne úsh kíshkentaı balasymen elge oraldy.
– 1 nauryz kúní ūshyp ketuímíz kerek edí. Bíraq sol kúní sırenalar qosylyp, atystar bastaldy. Bírden konsuldyq ókílderí habarlasyp, naqty nūsqaulyqtar berdí. Bírneshe táulík boıy alańdaushylyqta boldyq. Syrtqy íster mınıstrlígí men turıstík agenttík qyzmetkerlerí Maskatqa jetuímízge kómektestí, eshqandaı tólem alǵan joq. Ūshaqqa otyrǵanǵa deıín tolyq súıemeldedí. Osyndaı qamqorlyq úshín shynaıy rızashylyǵymyzdy bíldíremíz, – dedí Janat Tóleubekova.
Qaqtyǵys aımaǵynan oralǵan azamattar eldegí tynyshtyq pen tatulyqtyń baǵa jetpes qūndylyq ekenín basa aıtyp jatty. Árí qıyn shaqta memleket jedel shara qabyldap, jalǵyz qaldyrmady dep rızashylyqtaryn bíldírdí.
Qazírgí uaqytta Qazaqstan azamattaryn shetelden qaıtaru jūmystary múddelí memlekettík organdar men áue tasymaldaushylardyń úılestíruímen jalǵasyp jatyr. Qūzyrly qūrylymdar qauípsízdíktí basty nazarda ūstap, árbír azamattyń elge aman jetuín qamtamasyz etude.
Ayajan Serík
