Tún ortasy. Qala bayaulaǵanymen, Almatynyń keı kóshelerí osy uaqytta qaıta "oyanady": áuejaıǵa asyqqandar, jūmystan shyqqandar, jataqhanaǵa qaıtqan studentter… Al solardyń bárín túnde tasıtyn bír avtobus bar. Bír qyzyǵy, būl qoǵamdyq kólíktíń júretínín bílmeıtínder de bar. Qaı baǵyt? Qaı uaqytta? Qalaı mínesíz? Tolyǵyraq Aqshamnews.kz-tíń eksklyuzıv materıalynda.
Būl sūraq bízdí de beıjaı qaldyrmady. Sondyqtan túngí avtobusqa míníp, qalany aralap qaıttyq.
Saǵat 23:00-de Almaty áuejaıynan shyqqan avtobus Jarokov kóshesí men Abaı dańǵylynyń qıylysyna nebárí jarty saǵatta jettí.
Dál sol ayaldamadan bíz de míndík. Tańǵalarlyǵy, túngí uaqytqa qaramastan, qoǵamdyq kólíkte adam kóp boldy. Bírí jūmystan qaıtyp keledí, bírí jolǵa qamdanyp otyr, endí bírí jataqhanaǵa asyǵady.
"Jalǵyz avtobus bolǵan soń tez keledí"
Túngí 12 shamasynda avtobusqa Álı esímdí tūrǵyn míndí.
"Qalashyq" degen ayaldamadan túsemín. Jūmystan úıge bara jatyrmyn. Túngí avtobusqa jıí mínemín, baǵyty yńǵaıly, onyń ústíne, būl uaqytta júretín jalǵyz avtobus bolǵan soń tez keledí", – deıdí ol.
Álı sekíldí túngí avtobusty ádetke aınaldyrǵandar az emes. Sadyq esímdí tūrǵyn da jūmystan keıín úıíne kóbíne avtobuspen jetetínín aıtty.
"Jūmystan úıge bara jatyrmyn. Iá, baǵyty yńǵaıly. Ayaldama úıge jaqyn, tez jetemín", – deıdí Sadyq.
Túngí baǵyttyń "tírshílígí": júrgízushí ne deıdí?
№3 baǵyttyń júrgízushísí Ábílqaıyr Alqabaev "Almatyelektrotrans" kompanıyasynda eńbek etíp júrgeníne bıyl 3 jyl bolǵan.
"Bír aıda 15 kún jūmys ísteımín, yaǵnı 2/2. Túngí 23:00-den tańǵy 6:00-ge deıín ísteımíz. Túngí qalanyń qarqyny kúndízgímen bírdeı. Adam kóp bolmasa, az emes", – deıdí ol.
Júrgízushíníń aıtuynsha, túngí avtobus Áuejaıdan Tūńǵysh Prezıdent parkíne deıín qatynaıdy. Jolaushylar kóbíne Áuejaıdan, Súıínbaı, Nazarbaev, Altynsarın kóshelerí men Ál-Farabı dańǵyly boıynan mínedí.
"Kez kelgen ayaldamadan adam mínedí. Kóbíne jūmysshylar, odan bólek studentter de bar. Típtí tańerteń jūmysqa bara jatqan ózímníń ūjymdastarymdy da díttegen jeríne aparamyn", – deıdí Ábílqaıyr.
Túngí auysymnyń taǵy bír erekshelígí – aınalym sany. Júrgízushí tańǵy 6:50-ge deıín shamamen 3,5 aınalym jasap úlgeretínín aıtady. Būl uaqytta jūmys ísteıtín qyzmetkerlerdíń jalaqysy ekí eselenedí, yaǵnı eger 6 saǵat ístelse, 12 saǵattyq jūmysqa tólenedí.
Túngí reıstíń óz táuekelí jeterlík. Ábílqaıyrdyń sózínshe, keı kezderí agressıya tanytatyn, íshímdík íshíp alǵan jolaushylar da kezdesedí.
"Agressıya tanytyp, íshíp alyp, kólíkke mínetínder de bar. Bíraq bíz eshkímdí qumaımyz, eshkímdí kúshtep shyǵaruǵa bolmaıdy", – deıdí júrgízushí.
Júrgízushíníń būl sózín Marat esímdí tūrǵyn rastady.
"Qazír áuejaıǵa bara jatyrmyn. Onda baryp jylynamyn. Jaqynda áıelím qaıtys boldy. Jaǵdaıym auyrlap, baspanamnan aıyrylyp qaldym. Barar jerím, basar tauym joq. Sondyqtan ázírge osylaı kún kóríp júrmín. Júrgízushíníń túsínígí, adamgershílígí mol. Avtobustyń íshí jyly", - dedí ol.
Júrgízushí túnde ózgege asa baıqalmaıtyn "kedergí" turaly sóz qozǵady. Ol – ayaldama mańyna qoıylǵan kólíkter. Túnde kólík az bolǵanymen, keı júrgízushíler túngí avtobustyń júretínín eskere bermeıdí. Ábílqaıyr Alqabaev tūrǵyndarǵa úndeu jasady.
"Kóbí túnde avtobus júretínín bílmeıtín sıyaqty, kólíktí ayaldamaǵa qoıyp qoyady. Ásírese, taksı júrgízushílerí, kólíktí múmkín bolsa 10-15 metr alshaq qoısańyzdar, – deıdí ol.
Túngí qalada jyldamdyq ózgeshe sezíledí: jol ashyq, ayaldama sırek, tejelís kenet boluy múmkín. Sondyqtan júrgízushí jolaushylarǵa qarapaıym, bíraq mańyzdy keńes beredí:
"Míngennen keıín telefondy qaltaǵa salyp, eshqaıda súıenbeı, tūtqalardy ūstap tūrsa deımín. Keıde jedel toqtap qalǵan sátte eshteńe ūstap tūrmaǵan adamdar qūlap, sosyn renjíp jatady", - deıdí ol.
Ábílqaıyr Alqabaev jol aqysyn tólemeıtín "qoyandar" turaly dy píkír aıtty.
"Tólemeıtínder de bar, árıne. Qazaq "úsh nárseníń aqysyn jeme" deıdí ǵoı - íshken-jegenníń, ístegen jūmystyń jáne joldyń aqysy".
Túnde jūmys ísteu, onyń ústíne kólík júrgízu, árıne, ońaı emes. Būǵan kúsh pen jíger kerek. Júrgízushí kún saıyn ūıqymen arpalysyp, joldyń jauapkershílígín arqalap, túngí Almatynyń tynysyn kúzetíp júredí. Qatty sharshaǵan sátte ne ísteıdí? Būl sūraqqa keıípker jauap berdí.
"Qyzyǵy, kúndíz jūmys ístegende 5–6 saǵat ūıyqtap, tańerteń jūmysqa barsań, aǵza asa qınalmaıdy eken. Al túngí rejımde qansha ūıyqtasań da, tańǵa jaqyn - shamamen 3–4-terde ūıqy "qysady". Osyndaıda sońǵy ayaldamaǵa erterek kelíp, 5 mınuttaı syrtqa shyǵyp, sergíp aluǵa tyrysady"
Ol jūmys bítken soń úıíne tańǵy alty-jetílerde jetíp, túske deıín, árí ketse saǵat 14:00-ge deıín ūıyqtaıtynyn aıtty.
Ábílqaıyr Alqabaev otbasy turaly aıtty. Onyń otbasy Shymkentte bolǵandyqtan, qatynap jūmys ísteıdí. Sondyqtan jaqyndaryna kóńíl bólu keıde qıynǵa soǵatynyn da jasyrmaıdy. Bíraq "joldaǵy jauapkershílík" pen "úıdíń qamy" qatar júrgen tírlíktíń salmaǵy osyndaı ekenín ańǵartady.
Osylaısha, bíz №3 avtobustaǵy “túngí seruenímízdí” ayaqtadyq. 60 ayaldama, ekí qaıtara aınalym jasap, bír nársení anyq túsíndík: Almaty túnde bayaulaǵanymen, múlde ūıyqtamaıdy.
Memleket basshysy Qasym-Jomart Toqaev Almatyny “kóz ílmeıtín qalaǵa” aınaldyrudy tapsyrǵany beker emes. Dál mūndaı túngí qoǵamdyq kólíkter - qala tírshílígíníń aıqyn dálelí.