Seıfýllın dańǵyly men Jansúgirov kósheleriniń qıylysyndaǵy qoǵamdyq keńistikti abattandyryp, oazıske aınaldyrmaq
Almatyda jaıly qalalyq ortany qalyptastyrý baǵytynda júıeli jumys istelip jatyr. Pres-týr kezinde Jetisý aýdanynyń ákimi jýrnalıserge osylaı dedi. 2025 jyldyń sáýir aıynan bastap Seıfýllın dańǵyly men Jansúgirov kóshesiniń qıylysyndaǵy jol aıyryǵyna irgeles 3 gektar aýmaqta qoǵamdyq keńistikti abattandyrý jobasy júzege asyryla bastady, dep habarlaıdy aqshamnews.kz
Aýdan ákimdiginiń bastamasymen jol aıyryǵy mańynda ornalasqan segiz ýchaskede keshendi abattandyrý jumystary júrgizilip jatyr. Árqaısysy jer bederi men sáýletine qaraı ártúrli bezendirilmek. Bul jumysqa óz sektoryna jaýapty tórt merdiger uıym tartylǵan. Buryn bos, qaraýsyz jatqan aýmaqta endi yńǵaıly demalys aımaqtary, balalar men sport alańdary ashylyp, kishi arhıtektýralyq formalar, osy zamanǵy jaryqtandyrý júıesi men beınebaqylaý kameralary ornatylmaq.
«Biz aýmaqty da, turǵyndardyń usynysyn da muqıat zerttedik. Keńistik tórt negizgi aımaqqa bólingen. Kógaldandyrýǵa kóp kóńil bóldik. 30 000 sharshy metrden astam jerge jasyl-jelek egiledi. Sonymen qatar ınklúzıvti jáne qaýipsiz ınfraqurylym qurýǵa da mán berip otyrmyz. Balalar men sport alańdary, beınebaqylaý kameralary, aýyzsý fontanshalary men burǵylaý uńǵymalary arqyly avtomatty sýarý júıeleri ornatylady», – dedi Lázzat Jylqybaeva.
Jobanyń basty erekshelikteri – iri aǵashtar men butalar egip, alpilik tóbeshikter ornatpaq. Búkil aýmaqty turaqty sýarý úshin 7 uńǵyma qazyp, átkenshekter, oryndyqtar men gúl arkalary bar demalys oryndaryn jabdyqtap shyǵady. Beınebaqylaý, jaryqtandyrý men trotýar ınfraqurylymyn jasap, sondaı-aq oıyn alańdaryn ornatpaq.
Baspasóz týry barysynda aýdan ákimi ár ýchaskeniń ózindik maqsaty bar ekenin atap ótti. Mysaly:
• 1-ýchaske (Jansúgirov / Rysqulov kósheleri) – jaqyn mańdaǵy turǵyn úıler turǵyndaryna baǵyttalǵan, munda balalar men skeıt alańdary, sport aımaqtary men kógaldandyrylǵan keńistikter ornalasady.
• 2-ýchaske (Seıfýllın men Jansúgirov boıymen) – aýdannyń vızıttik kartochkasy, gúl arkalary, jasyl aleıalar jáne «Jetisý aýdany» degen jazýy bar dekoratıvti qabyrǵa ornatylady.
• 3-ýchaske («Baqytty otbasy» janynda) – erekshe qajettiligi bar balalardy qosa alǵanda, balalarǵa arnalǵan ınklúzıvti oıyn aımaqtarymen jabdyqtalady.
• 4-ýchaske (Seıfýllın dańǵyly boıymen vokzalǵa qaraı) – tabıǵı elementterge basymdyq berilgen ekologıalyq demalys aımaǵy, serýendeýge jaıly keńistik jasalady.
Barlyq ýchaskeni tolyq jaryqtandyryp, sondaı-aq súzgiden ótkiziletin aýyz sýmen de qamtamasyz etpek oıda.
«Bul endi abattandyrylǵan aýmaq qana emes, turǵyndardy tartyp turatyn, kólik torabynyń qaq ortasynda oryn tepken jasyl oazıs bolady», – dep atap ótti Jetisý aýdanynyń ákimi Lázzat Jylqybaeva.