2026 jyly Almaty qalasy mádenıet pen ónerdíń aldyńǵy qataryndaǵy halyqaralyq jáne respublıkalyq deńgeıdegí írí ís-sharalarǵa kuá bolady. Būl turaly Óńírlík kommunıkatsıyalar qyzmetínde ótken brıfıngte Almaty qalasy Mádenıet basqarmasynyń basshysy Danıyar Alıev habarlady.
"Almaty qalasy elímízdíń mádenı astanasy retínde mádenı-būqaralyq ís-sharalardy joǵary deńgeıde ūıymdastyruǵa erekshe mán beredí. Bíz qala tūrǵyndary men qonaqtaryna ónerdíń barlyq baǵyttaryn qamtıtyn, zamanauı árí mazmūndy mádenı baǵdarlamalar ūsynamyz. 2026 jyly almatylyqtardy jarqyn árí este qalarlyq mádenı oqıǵalar kútíp tūr", – dedí basqarma basshysy.
Teatrlyq qoıylymdar:
"Alatau" dástúrlí óner teatry "Taza Qazaqstan" ekologıyalyq aktsıyasyn qoldau maqsatynda "Taza júrek" spektaklíníń premerasyn kórermen nazaryna ūsynbaq. Al Memlekettík akademıyalyq quyrshaq teatry atalǵan bastama ayasynda "Tazalyq saqshylary" qoıylymyn sahnalaudy josparlap otyr.
Sonymen qatar, "Alatau" dástúrlí óner teatry ózíníń 10 jyldyq mereıtoıyna oraı bírqatar jańa qoıylym ázírleude. Atap aıtqanda, Baqyt Bedelhannyń shyǵarmashylyǵyna arnalǵan "Baqytpen uaqyt" myuzıklí, Jambyl Jabaevtyń 180 jyldyǵyna arnalǵan muzykalyq-teatrlandyrylǵan "Jyr alyby – Jambyl" qoıylymy, sondaı-aq Mūhtar Maǵauınníń shyǵarmasy negízínde qoıylatyn "Jaryǵym" muzykalyq dramasy kórermenge jol tartpaq.
Teatr 2026 jyly "Mamluk. Sūltan Beıbarys" qoıylymymen halyqaralyq jáne respublıkalyq gastroldík sapar ūıymdastyryp, Egıpet elínde, sondaı-aq Atyrau men Astana qalalarynda óner kórsetudí josparlap otyr.
Memlekettík akademıyalyq quyrshaq teatry 2026 jyly "Alty jasar Alpamys", "Jaqsylyq pen Jamandyq", "Oskar jáne Raushan hanym", "Almaty – eń alǵashqy mahabbatym", "Qar hanshaıymy" atty jańa spektaklderín kórermen nazaryna ūsynbaq.
Odan bólek, "Jańa ǵasyr" teatry da repertuaryn jańa premeralarmen tolyqtyrady. Atap aıtqanda, "Teńízdegí tórteu" tragıfarsy, balalarǵa arnalǵan "Aladdın" ertegísí jáne "Jámıla" muzykalyq dramasy sahnalanady.
Kontserttík baǵdarlamalar:
KSRO halyq ártísí, qazaq muzyka óneríníń kórnektí ókílí Ermek Serkebaevtyń 100 jyldyǵyna oraı Almaty áuenderí mekemesíníń barlyq shyǵarmashylyq ūjymdarynyń qatysuymen mereıtoılyq kontsert ótkízu josparlanuda. Sonymen qatar, Respublıka saraıynyń 55 jyldyq mereıtoıyna baılanysty jeke oryndaushylardyń gastroldík sapary ūıymdastyrylyp, joba Qazaqstan Respublıkasynyń bírqatar óńírlerín qamtymaq.
Tsırk baǵdarlamalary:
Aqpan aıynda Qazaq Memlekettík tsırkínde Italıyalyq duet Flavıo men Bruno Tonıdíń "BELISSIMO" shou baǵdarlamasy alǵash ret ótedí. Baǵdarlamada Bruno Tonıdíń aty ańyzǵa aınalǵan úıretílgen qyzǵylt jáne aq jolbarystary, akrobattar, áuedegí ımpasato jáne arqanmen júretín ónerpazdar, sheber jonglerler, Latyn Amerıkasynan kelgen kóńíldí saıqymazaqtar bolady.
Al nauryz-sáuír aılarynda Nauryzbaı jáne Jetísu audandarynda Shapıto jyljymaly tsırkí ūıymdastyrylady.
Halyqaralyq festıvalder:
2026 jyly Almatyda "Almaty Circus Festival", "Almaty Puppet Festival", "Ūly dala – kóshpendíler álemí" etnofestıvalí, "Ashyq aspan astyndaǵy tsırk", "Ǵasyrlar sazy", "Almaty suretshíler kózímen", Almaty Film Festival, sondaı-aq "Ánshí balapan" jobasynyń zamanauı formattaǵy nūsqasy ótkízíledí.
2026 jyly ūıymdastyrylatyn IV Halyqaralyq "Almaty Puppet Festival" quyrshaq teatrlary festıvalí álemníń úzdík teatr ūjymdarynyń basyn qosady. Festıval otandyq jáne sheteldík óner ūjymdary arasyndaǵy shyǵarmashylyq baılanysty nyǵaıtyp, kásíbı tájírıbe almasuǵa, sondaı-aq balalar men jasóspírímderge arnalǵan teatr ónerín keńínen nasıhattauǵa baǵyttalady.
Qorytyndylaı kele, 2026 jyly Almaty qalasy muzyka, teatr, bı, kórkemóner jáne ádebıet salasyndaǵy írí halyqaralyq festıvalder men baıqaular ótetín mádenı ortalyq retínde óz mártebesín aıqyndaı túsedí. Josparlanǵan ís-sharalar qalanyń mádenı áleuetín arttyryp qana qoımaı, tūrǵyndar men qonaqtarǵa joǵary deńgeıdegí ruhanı demalys pen ūmytylmas áser syılaıdy.