Memleket basshysy «Áskerı qyzmettíń belgílengen merzímín ótkergen merzímdí áskerı qyzmettegí áskerı qyzmetshílerdí zapasqa shyǵaru jáne Qazaqstan Respublıkasynyń azamattaryn 2026 jyldyń nauryz-mausymynda jáne qyrkúıek-jeltoqsanynda merzímdí áskerı qyzmetke kezektí shaqyru turaly» Jarlyqqa qol qoıdy, – dep habarlaıdy aqshamnews.kz tílshísí.
Prezıdent Jarlyǵyna sáıkes, 17 nauryzdan bastap qalalyq jáne audandyq shaqyru komıssıyalary ákímderdíń orynbasarlarynyń tóraǵalyǵymen azamattardy merzímdí áskerı qyzmetke shaqyrudy bastady.
– 30 mausymǵa deıín 18-27 jas aralyǵyndaǵy 21 myńnan astam azamatty Qaruly kúshterdíń, basqa da áskerler men áskerı qūralymdardyń qataryna shaqyru josparlanyp otyr. Onyń íshínde 11 myńnan astam adam Qaruly kúshterge, 7 myńnan astam adam ÍÍM Ūlttyq ūlanyna, 2 myńǵa juyq adam ŪQK Shekara qyzmetíne, 400-ge juyq adam Tótenshe jaǵdaılar mınıstrlígíne, 300 adam Memlekettík kúzet qyzmetíne shaqyrylady, – dep atap óttí QR Qaruly kúshterí Bas shtaby Ūıymdastyru-jūmyldyru jūmystary departamentíníń bastyǵy general-maıor Almas Isabekov.
Ol sondaı-aq azamattarǵa shaqyru SMS-habarlama jáne eGov portalyndaǵy habarlandyrular arqyly kemínde úsh kún būryn jíberíletínín eske saldy. Mūndaı habarlamalar resmı shaqyru bolyp esepteledí. Shaqyrtu alǵan azamat jergílíktí áskerı basqaru organyna nemese shaqyru punktíne keluge míndettí.
Qorǵanys mınıstrlígí áskerı esepke alu protsesín avtomattandyryp, «Smart voenkomat» jobasyn júzege asyruda. Būl júıe shaqyrylushylar men áskerı míndettílerdíń jeke esebín júrgízedí, azamattar tūrǵylyqty jerín ózgertken kezde avtomatty túrde áskerı esepke qoyady, 17 jastaǵy jasóspírímderdí áskerı esepke tírkeudí, sondaı-aq shaqyrudy keıínge qaldyru nemese odan bosatudy avtomatty túrde rásímdeudí qamtamasyz etedí.
Osylaısha, 2025 jyly 457 myńnan astam adamǵa keıínge qaldyru beríldí. Áskerge shaqyru turaly būıryqtar elektrondyq formatta resímdeletínín atap ótu kerek. Būl áskerı qyzmetshílerge nesıelík demalys beru úshín málímetterdí kredıttík byurolarǵa avtomatty túrde jíberuge múmkíndík beredí.
Sonymen qatar, shaqyrylushylardy medıtsınalyq kuálandyru kezínde qoldanylatyn «E-Medosmotr» medıtsınalyq júıesíne ıntegratsıya engízíldí. Qazírgí uaqytta tsıfrlyq medıtsınalyq tekseru Astana, Shymkent qalalarynda, Almaty, Batys Qazaqstan jáne Jetísu oblystarynda keńínen qoldanylady. Būl rette 2025 jyly 17 myńnan astam shaqyrylushy medıtsınalyq kuálandyrudan tsıfrlyq formatta ótkenín atap ótu kerek.
Merzímdí áskerı qyzmet ótkeríp júrgen azamattarǵa memleket tarapynan bírqatar qoldau sharalary qarastyrylǵan. Atap aıtqanda, olarǵa nesıelík demalystar beríledí, sondaı-aq ŪBT nátıjelerín esepke almaı, joǵary oqu oryndaryna memlekettík bílím beru granttarymen túsu múmkíndígí beríledí.
– 2023 jyldan berí 9 myńnan astam sarbaz ŪBT tapsyrmaı, joǵary oqu oryndaryna tústí. Tek 2025 jyldyń ózínde būl múmkíndíktí 3 300 áskerı qyzmetshí paıdalandy, – dep atap óttí general-maıor Almas Isabekov.
20 myńnan astam áskerı qyzmetshíge negízgí qaryz ben syıaqy boıynsha shamamen 8,8 mlrd teńge kólemínde nesıelík demalys beríldí. Sonymen qatar, qyzmet barysynda sarbazdar Qaruly kúshterdíń túrlerí boıynsha kíshí mamandar dayarlaıtyn oqu ortalyqtarynda jūmysshy mamandyqtaryn meńgere alady.
Būdan bólek general-maıor Almas Isabekov dálelsíz sebeptermen jergílíktí áskerı basqaru organdaryna kelmeu Qazaqstan Respublıkasynyń zańnamasynda qarastyrylǵan jauapkershílíkke ákeletínín atap óttí. Ondaı jaǵdaıda azamatqa ákímshílík sharalar qoldanyluy múmkín. Al shaqyrudan jaltarǵan jaǵdaıda qylmystyq zańnama normalaryna sáıkes jauapkershílík qarastyrylǵan.