Tírkelgen qatysushylar sany boıynsha Aqtóbe oblysy — shamamen 44 myń adammen kósh bastap tūr, – dep habarlaıdy aqshamnews.kz tílshísí.
Marafonnyń resmı platformasynda qatysushylardy tírkeu 2026 jylǵy 2 qyrkúıekte bastaldy. Alǵashqy kúnderdegí joǵary kórsetkísh azamattardyń kítap oqu mádenıetín damytuǵa jáne túrlí áleumettík árí jas toptaryn kítap qūndylyǵy tóńíregínde bíríktíruge baǵyttalǵan bastamaǵa degen zor qyzyǵushylyǵyn kórsetedí.
Tírkelgen qatysushylar sany boıynsha Aqtóbe oblysy — shamamen 44 myń adammen kósh bastap tūr. Odan keıín Jetísu oblysy — shamamen 16 myń jáne Batys Qazaqstan oblysy — shamamen 10 myń qatysushymen keledí.
Osylaısha, tírkeudíń alǵashqy bes kúnínde belgílengen nysanaly kórsetkíshtíń 10 paıyzdan astamyna qol jetkízíldí.
Marafon ártúrlí buyn, mamandyq jáne qoǵamdyq orta ókílderín bíríktíretín jetí baǵyt boıynsha ótude: «Kítap oqıtyn mektep» — 51 148 qatysushy; «Kítap oqıtyn pedagog» — 23 435 qatysushy; «Kítap oqıtyn áulet» — 1 716 qatysushy; «Kítap oqıtyn kolledj» — 11 061 qatysushy; «Kítap oqıtyn unıversıtet» — 4 692 qatysushy; «Kítap oqıtyn memlekettík qyzmetshí» — 3 181 qatysushy; «Kítap oqıtyn zıyatker» — 8 332 qatysushy.
Qazírgí tańda eń joǵary kórsetkísh «Kítap oqıtyn mektep» baǵytyna tıesílí — 51 myńnan astam qatysushy tírkelgen. Pedagogter arasynda da marafonǵa qyzyǵushylyq joǵary: «Kítap oqıtyn pedagog» baǵyty boıynsha 23 myńnan astam adam tírkeldí.
«Kítap oqıtyn ūlt – Chıtayushchaya natsıya» qoǵamdyq qorynyń atqarushy dırektory Ayan Sakoshevtíń aıtuynsha, alǵashqy nátıjeler bastamaǵa degen joǵary qoǵamdyq qyzyǵushylyqty kórsetíp otyr.
«Marafonnyń alǵashqy kúnderínen bastap osynshama kóp qatysushynyń basyn qosuy bíz úshín asa mańyzdy. Būl kórsetkíshtíń artynda mektep oqushylary men pedagogter, otbasylar men studentter, memlekettík qyzmetshíler, belsendí oqyrmandar jáne túrlí kásíbı salalardyń ókílderí tūr. Būl kítap oquǵa degen qyzyǵushylyqtyń ártúrlí buyn men óńír tūrǵyndaryn bíríktíretínín kórsetedí. Óńírler tarapynan belsendílíktí baıqap otyrmyz jáne tírkeu ayaqtalǵanǵa deıín marafonǵa qatysushylar sany odan árí arta túsedí dep senemíz», — dedí «Kítap oqıtyn ūlt – Chıtayushchaya natsıya» qoǵamdyq qorynyń atqarushy dırektory Ayan Sakoshev.
Qatysushylardy tírkeu 2026 jylǵy 15 qyrkúıekke deıín jalǵasady.
Marafonnyń maqsaty — kítap oqudy bílím aludyń, zıyatkerlík damudyń jáne zamanauı mádenı ortany qalyptastyrudyń mańyzdy qūramdas bólígí retínde dárípteu.
Ūıymdastyrushylar mektep oqushylaryn, pedagogterdí, studentterdí, otbasylardy, memlekettík qyzmetshílerdí jáne kítap oqu qūndylyǵyn qoldaıtyn barsha azamattardy tírkeu ayaqtalǵanǵa deıín marafonǵa qatysuǵa shaqyrady.