Qazaqstanda Djekı Channyń qatysuymen ańyzǵa aınalǵan shytyrman oqıǵaly «Qūdaı sauyty» franshızasynyń jalǵasy túsíríledí, – dep habarlaıdy aqshamnews.kz tílshísí.
Túsírílím jūmystary Mańǵystau jáne Almaty oblystarynda, sondaı-aq Almaty, Astana jáne Túrkístanda - Djekı Channyń ózí 2025 jyldyń sońynda Qazaqstanǵa jasaǵan sapary barysynda tańdaǵan bíregeı tabıǵı oryndarda túsíríledí. Túsírílímderdíń bír bólígí Gonkongta ótedí.
Mıhaıl Lomtadze, Kaspi.kz basshysy árí negízín qalaushylardyń bírí:
«Djekı Chan qatysatyn áıgílí fılmníń jalǵasy dál Qazaqstanda túsíríletíníne quanyshtymyz. Būl bíz úshín óte mańyzdy joba, óıtkení ol álemníń túkpír-túkpíríndegí kóptegen adamdarǵa Qazaqstannyń erekshe ásem, zamanauı árí qonaqjaı el ekenín kórsetuge múmkíndík beredí.
Bastamany qolǵa alǵan seríktesterímíz – Sálem Entertainment pen Adal Investments-ke alǵys aıtamyz jáne Djekı Chan men barlyq túsírílím tobyna Qazaqstandaǵy jūmystaryna tabys tíleımíz».
Igor Tsaı, CEO Salem Entertainment:
«Būl jobaǵa qatysu – búkíl kınoındustrıya úshín de, Salem Entertainment kompanıyasy úshín de úlken jauapkershílík árí halyqaralyq auqymdaǵy írí kınojobany júzege asyruǵa berílgen bíregeı múmkíndík.
Joba Gollıvud, Gonkong, Qazaqstan jáne ózge de jaqyn shet memleketteríníń jetekshí kıno mamandaryn bíríktíredí, būl ony halyqaralyq deńgeıdegí joǵary sapamen júzege asyruǵa múmkíndík beredí.
Osyndaı auqymdy jobanyń íske asuy onyń joǵary kommertsıyalyq áleuetíníń jáne Kaspi.kz sekíldí senímdí jergílíktí seríktesterdíń qoldauynyń arqasynda múmkín boldy».
«Qūdaıdyń sauyty» – Djekı Channyń shyǵarmashylyq jolyndaǵy eń tanymal shytyrman oqıǵaly franshızalardyń bírí. Bírínshí fılm 1986 jyly jaryq kóríp, álemdík hıtke aınaldy.
Jobanyń bastamashylary – Sálem Entertainment jáne Adal Investments. «Qūdaıdyń sauyty: Ultımatum» fılmíníń tūsaukeserí 2027 jyldyń aqpan aıyna josparlanǵan.