Kardıologıa jáne ishki aýrýlar ǵylymı-zertteý ınstıtýty «Kardıohırýrgıa (eresekter, balalar)» mamandyǵy boıynsha rezıdentýra baǵdarlamasynyń halyqaralyq akredıtteýinen sátti ótip, sertıfıkatyn ıelendi.
Akredıtteý týraly kýálikti Bilim berý men densaýlyq saqtaý salasyndaǵy sapany qamtamasyz etý jónindegi Eýrazıalyq akredıtteý ortalyǵy (EAO) tabystady. EAO Akredıtteý keńesi baǵdarlamanyń joǵary oqý ornynan keıingi medısınalyq bilim berý standarttaryna sáıkestigin rastady. Kýálik 5 jyl merzimge jaramdy.
Sarapshylar ınstıtýttyń ınfraqurylymymen jáne materıaldyq-tehnıkalyq jabdyqtalýymen, kadrlyq quramymen, oqý-ádistemelik qamtamasyz etilýimen, bilim berý prosesiniń aqparattyq resýrstarymen, sondaı-aq kompúterlik jáne baǵdarlamalyq qamtamasyz etilýimen tanysty. Oqytýshylardyń quzyrettiligine, rezıdentterdiń klınıkalyq daıarlyǵynyń sapasyna baǵa berildi. Klınıkalyq bazalardyń rezıdentterdiń oqý prosesin tolyq qamtamasyz etýge barlyq múmkindigi bar ekeni atap ótildi.
«Instıtýttyń bilim berý qyzmeti elimizdiń densaýlyq saqtaý júıesi úshin joǵary bilikti jáne básekege qabiletti kadrlardy daıarlaýǵa baǵyttalǵan. Instıtýtta bilim alýshylardyń barlyq sanatyn daıarlaý jáne qaıta daıarlaý úshin qajetti barlyq múmkindik bar. Profesor-oqytýshylar quramynyń kadrlyq áleýetiniń joǵary deńgeıi – ınstıtýttyń básekege qabilettiliginiń negizgi faktorlarynyń biri», – deıdi atalǵan ınstıtýttyń Basqarma tóraǵasy Rústem Tóleýtaev.
Sarapshylar jumys berýshilermen jáne rezıdentýra tyńdaýshylarymen suhbat júrgizip, ınstıtýttyń bilim berý baǵdarlamalary boıynsha daıarlyq sapasyna jáne bilim alýshylardyń kásibı bilim alý deńgeıine joǵary baǵa berdi. Jumys berýshilerdiń pikirinshe, ınstıtýt rezıdentýrasynyń túlekteri teorıalyq jáne praktıkalyq bilimderi men daǵdylarynyń joǵary deńgeıin kórsetedi. Túlekterdi jumysqa ornalastyrý kórsetkishi jyl saıyn 100 paıyzdy quraıdy.
Dárigerdiń kásibı qyzmetiniń tabystylyǵy kóp jaǵdaıda oqý kezeńinde rezıdent jumys isteıtin klınıkalyq bólimsheleriniń ujymdaryndaǵy qolaıly ahýalǵa baılanysty. Bilim berý baǵdarlamalaryn iske asyrý kásibı bilim alýǵa jáne bilim alýshynyń eńbek qyzmetine daıyn bolýyna yqpal etedi.