Karachı qalasynda Qazaqstan men Pákístan arasyndaǵy bıznes-forum óttí. Ís-sharaǵa ekí eldíń 500-den astam bıznes jáne memlekettík qūrylym ókílderí qatysty.
Forumǵa naqty mámíleler men ūzaq merzímdí áríptestíkke baǵyttalǵan kásípkerlerdíń belsendílígí erekshe serpín berdí. Ís-shara ayasynda bírneshe kommertsıyalyq kelísímderge qol qoıyldy. Sonyń íshínde qazaqstandyq Optima Development kompanıyasy men pákístandyq Friesland Campina Engro arasynda jalpy somasy 10 mln AQSh dollaryn qūraıtyn kelísímshart jasaldy. Qūjat Qazaqstanǵa írímshík, ıogurt jáne kondıterlík ónímder óndírísíne qoldanylatyn susyzdandyrylǵan sút maıyn jetkízudí kózdeıdí.
«Būl Pákístanmen osyndaı auqymdaǵy alǵashqy kelísímderdíń bírí. Būl bír rettík tauar jetkízu emes, ūzaq merzímdí árí strategıyalyq seríktestíktíń bastauy dep esepteımíz. 240 mıllıon halqy bar Pákístan – Qazaqstan úshín zor eksporttyq áleuetke ıe el», - dedí Optima Development kompanıyasynyń bas dırektory Janat Basanūly.
Qazaqstan Respublıkasy Sauda jáne ıntegratsıya mınıstrlígíne qarasty QazTrade sauda sayasatyn damytu ortalyǵynyń derekteríne sáıkes, 2023–2024 jyldary Qazaqstan men Pákístan arasyndaǵy tauar aınalymy 2,1%-ǵa ósíp, 53,6 mln dollarǵa jetken. Qazaqstannan Pákístanǵa eksport kólemí 2,1 esege artyp, 11,8 mln dollarǵa deıín ósken. Eksporttyń negízgí bólígín auyl sharuashylyǵy ónímderí: pıyaz, sarymsaq, zyǵyr tūqymy, būrshaq tūqymdastar jáne metall konstruktsıyalar qūraıdy. Al Pákístannan ımport kólemí 41,9 mln AQSh dollaryn qūrady. Onyń íshínde tsıtrus jemísterí, dárílík preparattar men toqyma būıymdary bar.
Sondaı-aq, forum ayasynda Qazaqstanǵa Karachı men Gvadar porttaryna qoljetímdílíktí qamtamasyz etetín Tranzıttík sauda turaly kelísímge qol qoıyldy. Būl qūjat ekí el arasyndaǵy jańa kólík-logıstıkalyq baǵyttardy damytuǵa jáne ekonomıkalyq baılanysty nyǵaıtuǵa negíz qalaıdy.