Búgín túnde qala tūrǵyndary Almaty áuejaıynyń halyqaralyq termınalynda Kanadadan jeńíspen oralǵan Astana Team balalar hokkeı komandasyn ystyq yqylaspen qarsy aldy, – dep habarlaıdy aqshamnews.kz tílshísí.
Kvebekte ótken turnırde qazaqstandyqtar 2013 jyly tuǵan balalar arasyndaǵy kúsh jaǵynan ekínshí sanalatyn AA Elites dıvızıonynda Quebec International Pee-Wee Hockey Tournament 2026 jarysynyń jeńímpazy atandy. Komandanyń būl jeńísí keıíngí bírneshe kúnde Qazaqstannyń áleumettík jelílerínde qyzu talqylandy.
Komanda qūrama retínde óner kórsettí. Qūramynda Óskemenníń «Torpedo», «Astana», Qaraǵandynyń «Yunost» jáne ózge de klubtardyń oıynshylary boldy. Turnır barysynda Astana Team Kanada men AQSh qarsylastaryna qarsy alty match ótkízdí.
Noir d’Or des Montagne komandasyna qarsy fınalda qazaqstandyq jas hokkeıshíler mínez tanytty. Alǵashynda 1:3 esebímen ūtylyp jatqan olar tarazy basyn teńestíríp, oıyndy overtaımǵa jetkízdí, keıín bullıtter serıyasynda jeńíske jettí. Komandanyń bas bapkerí Vladımır Zaharov sheshushí matchtan keıíngí áserímen áuejaıda bólístí.
«Bíz Kvebekke eń jaqsy qasıetterímízdí kórsetíp, turnırde jeńíske jetu nıetímen bardyq. Byltyr da fınalǵa deıín jetkenbíz, bíraq sál ǵana jetpeı qalǵan edí. Būl joly 1:3 esebímen ūtylyp jatyp, jígítter mínezíníń arqasynda eseptí teńestírdí, oıyndy overtaımǵa aparyp, keıín bullıtpen jeńdí. Azıyadan kelgen komandanyń jeńísí kútpegen jaǵdaı boldy — ūıymdastyrushylar bízdí túregep tūryp qol soǵyp qūttyqtady. Jerlesterímízdíń bíz úshín jankúıer bolǵanyn sezínu óte quanyshty boldy. Al Qazaqstan Prezıdentí Qasym-Jomart Toqaevtyń osy turnırdegí jeńísímízben qūttyqtaǵanyn estígende, būl bíz úshín úlken mártebe árí zor quanysh boldy. Osyndaı jarystar myqty qarsylastarmen básekede shyńdalyp, bolashaqta kásíbı komandalarǵa laıyqty hokkeıshíler daıyndauǵa múmkíndík beredí», – dedí ol.
«Yunost» komandasynyń qorǵaushysy, almatylyq Artyom Ekımov jankúıerlerge jyly qarsy alǵany úshín alǵys aıtyp, sheshushí oıyndardyń ońaı bolmaǵanyn atap óttí.
«Jartylaı fınal men fınalda óte qıyn boldy. Bíraq bapkerdíń tapsyrmalaryn oryndap, turnırde jeńíske jetkenímízge quanyshtymyn. Mūhıttyń arǵy jaǵynda óz kúshíńdí synau óte qyzyq. Qarsylastar bízden oıyn kórsetkíshí jaǵynan áldeqaıda basym boldy dep aıta almaımyn, bíraq olar ár sátke deıín kúresedí. Bíz ózímízdí jaqsy qyrynan tanytyp, ata-anamyzǵa, dostarymyzǵa jáne barsha otandastarymyzǵa quanysh syılaǵanymyzǵa rızamyz. Qarsy shabuylǵa negízdelgen taktıka ózín aqtady. Al bíz, qorǵaushylar, eń aldymen óz qaqpamyzdyń qauípsízdígín qamtamasyz etuge tyrystyq. Jeńísímíz osynshalyqty úlken nazar audarady dep kútpedím. Būl tek bastamasy ǵana dep senemín. Bolashaqta kásíbı hokkeıshí atanyp, bír kúní Stenlı kubogyn jeńíp aludy armandaımyn», – dedí jas sportshy.
