2025 jyldyń basynan beri áleýmettik ınspektorlar 218 tekserý júrgizdi, onyń 99-y jospardan tys, 42 – profılaktıkalyq baqylaý sheńberinde, 77 – prokýratýranyń talaby boıynsha ótti.
Tekserý qorytyndysy boıynsha anyqtalǵan buzýshylyqtardy joıý týraly 94 uıǵarym berildi, 18,4 mln teńgeden astam somaǵa 62 aıyppul salyndy, dep habarlaıdy aqshamnews.kz.
Memlekettik baqylaýmen: ákimdikter – 6, jergilikti atqarýshy organdardyń bólimderi men basqarmalary – 44, memlekettik mekemeler – 27, balabaqshalar – 6, mektepter – 21, kolejder, lıseıler – 5, aýrýhanalar, emhanalar – 11, arnaýly áleýmettik qyzmetter kórsetý ortalyqtary – 3, avtobýs parkteri, avto/temir jol vokzaldary, áýejaılar – 7, DK – 12, dúkender – 16, saýda úıleri – 12, kafeler, meıramhanalar, qonaq úıler – 10, polısıa pýnkti – 1, stomatologıa – 3, kitaphana – 1, mádenıet úıleri – 4, muraǵattar men murajaılar – 1, sanatorııler – 3, poshta qyzmeti bólimshesi – 1, sport mektepteri – 6, notarıýs – 1, ózge de 17 obekti qamtyldy.
Máselen, QR EHÁQM Halyqty áleýmettik qorǵaý salasyndaǵy retteý jáne baqylaý komıtetiniń Aqmola oblysy boıynsha departamenti jeke tulǵanyń ótinishi negizinde Kókshetaý qalasyndaǵy mektepte múgedektigi bar adamdar úshin qoljetimdiliktiń bolmaýy faktisi boıynsha jospardan tys tekserý júrgizdi. Tekserý nátıjeleri boıynsha sýbekt aıyppul túrinde ákimshilik jaýapkershilikke tartyldy.
Bul rette áleýmettik ınspektorlardyń aıtýynsha barlyq óńirlerde múgedektigi bar adamdar úshin áleýmettik ınfraqurylymdy beıimdeýdegi oń ózgerister bar. Muny erekshe qajettilikteri bar adamdar da rastaıdy.
«Jyl saıyn múgedektigi bar azamattarǵa qoljetimdilik jaǵdaılary jaqsaryp keledi. Obektilerdiń ıeleri men kásipkerlerdiń erekshe qajettilikteri bar adamdarǵa degen qurmeti men jaýapkershiligi kóńilge aıryqsha medet beredi. Jańa nysandar múgedektigi bar adamdar úshin qoljetimdi ekenin, barlyq sanattar úshin qoljetimdilik qarastyrylǵanyn, pandýstar, baspaldaqtardaǵy tutqalar, taktıldi quraldar, lıftter bar ekenin atap ótkim keledi. Burynnan jumys istep turǵan nysandar da kelýshiler úshin yńǵaıly baǵdarlanǵan, bizge de óte qol jetimdi. Máselen, Kókshetaý qalasynyń Ortalyq bazaryna kúrdeli jóndeý júrgizildi, eger buryn bunda qoljetimdilik aıtarlyqtaı qıyndyq týdyrǵan bolsa, qazir oǵan eshbir súıemeldeýsiz kirýge bolady, tipti ekinshi jáne úshinshi qabatta da lıft bar. Qazirgi ýaqytta memleket kórsetetin kóptegen qyzmetterdi HQKO-dan alýǵa bolatyny belgili, ol jerde de qol jetimdilik barynsha qamtamasyz etilgen, pandýstary yńǵaıly, esikteri keń, kedergi keltiretin tabaldyryqtar múldem alynyp tastalǵan», – dep óz oıymen bólisti birinshi toptaǵy múgedektigi bar Kókshetaý qalasynyń turǵyny Talǵat Ýaısov myrza.