Abaı ýnıversıtetinde «Qysqy mektep – 2026: Pedagogıkalyq bilim berýdi jańartý jáne zertteýshilik daǵdylardy damytý» taqyrybyndaǵy dástúrli qysqy mektep jumysy odan ári jalǵasyn tapty. İs-sharaǵa prorektorlar, fakúltet dekandary, kafedra meńgerýshileri men oqytýshy-professorlar qatysty. Qazirgi tańda adamzat jańa tehnologıalyq kezeńge – jasandy ıntellekt dáýirine qadam basty. Memleket basshysy Qasym-Jomart Toqaevtyń 2026 jyldy «Sıfrlandyrý jáne jasandy ıntellekt jyly» dep jarıalaýy da – ýaqyt talaby men jahandyq úrdisterge saı qabyldanǵan mańyzdy sheshim. Bul bastama beker emes. Sebebi jasandy ıntellekt ekonomıka, medısına, óndiris salalarymen qatar, bilim berý júıesiniń de mazmuny men formatyn túbegeıli ózgertip otyr. Ásirese, pedagogıka salasynda JI-diń róli artyp, oqytý ádistemesin jańǵyrtý, oqytýshynyń kásibı quzyretterin jetildirý, zertteýshilik mádenıetti damytý máseleleri aldyńǵy qatarǵa shyqty. Osy ózekti mindetterge daıyn bolý maqsatynda Abaı ýnıversıtetinde dástúrli qysqy mektep uıymdastyrylyp, semınar-trenıngter jalǵasyp jatyr. Jobanyń negizgi taqyryby – jasandy ıntellekt dáýirindegi joǵary bilimniń damýyndaǵy trendter men syn-qaterler boldy.
Jıyndy akademıalyq qyzmet jónindegi prorektor Baný Narbekova ashyp, pedagogıkalyq bilim berýdiń bolashaǵyna arnalǵan strategıalyq baǵyttarǵa toqtaldy. Ol sıfrlandyrý men jasandy ıntellekt jaǵdaıyndaǵy joǵary bilimniń jahandyq úrdisteri, eńbek naryǵyna jáne pedagog kadrlardy daıarlaý júıesine JI yqpaly týraly baıandady. Sondaı-aq, muǵalim daıarlaýdyń jańa modelderi, sıfrlyq dáýir pedagoginiń kásibı quzyretteri, bilim berý úderisinde jasandy ıntellektti qoldanýdyń etıkalyq máselelerin qozǵady. Elimizdegi joǵary bilim salasyndaǵy zańnamalyq ózgeristerdi, pedagogıkalyq bilim berýdi damytýǵa baǵyttalǵan halyqaralyq tájirıbeler mysalyn sarapqa saldy. Qysqy mektep aıasynda «Shyǵarmashylyq oılaý arqyly kásibı komýnıkasıa men ózara qoldaýdy qalyptastyrý» atty psıhologıalyq trenıń uıymdastyryldy. Trenıńti áleýmettik damý jónindegi prorektor Maqsat Jaqaýov jáne psıhologtar Saıda Qosbaı men Ásel Júsipekova júrgizdi. Qatysýshylar stýdentterge kórsetiletin psıhologıalyq qoldaý máselelerin qozǵap, qyzmet sapasyn arttyrýǵa baǵyttalǵan usynystardy talqylady. Aıta keteıik, «Qysqy mektep – 2026» aldaǵy kúnderi kásibı pikirtalastar men tájirıbe almasý alańy retinde jumysyn jalǵastyrady. Onda pedagogıka salasyndaǵy jańa úrdister men jasandy ıntellekt dáýirindegi bilim berýdiń ózekti máseleleri keńinen qamtylyp, túrli tyń taqyryptar boıynsha semınar-trenıngter ótkizilmek.