Qazaqstan Aýǵanstandaǵy 6,3 baldyq joıqyn jer silkinisinen zardap shekkenderge shuǵyl medısınalyq kómekti jalǵastyryp jatyr. Prezıdent tapsyrmasymen gýmanıtarlyq júk pen dárigerler toby aımaqqa jiberilip, qazirdiń ózinde oqıǵa ornynda jumys istep jatyr, - dep habarlaıdy Aqshamnews.kz tilshisi.
QR Densaýlyq saqtaý mınıstrliginiń málimetinshe, memlekettik rezervten Aýǵanstanǵa dári-dármek, hırýrgıalyq quraldar, tańǵysh materıaldar, palatkalar, tósek-oryn jabdyqtary jáne ózge de shuǵyl kómekke qajet qural-jabdyqtar jetkizildi.
Mısıa quramyna tájirıbeli travmatolog-ortopedter, neırohırýrgter jáne shuǵyl medısına mamandary kirgen. Atap aıtqanda:
-
Akademık Batpenov atyndaǵy Ulttyq ǵylymı travmatologıa jáne ortopedıa ortalyǵynan: O. Bekarısov, D. Galym, A. Dolgov, R. Abılov, B. Turlybekov;
-
Ulttyq neırohırýrgıa ortalyǵynan: S. Karıbaı, N. Ashırov, A. Qadyrov;
-
Ulttyq shuǵyl medısınany úılestirý ortalyǵynan: A. Satvaldın, S. Nurtazın, R. Salımov, A. Kıdirbaev, G. Túsipbekov.
Dárigerler jergilikti medısına qyzmetkerlerimen birge naýqastardy suryptap, operasıalardyń kezektiligin josparlaýǵa kómektesip, eń kúrdeli jaǵdaılarǵa tikeleı qatysyp jatyr. Osy ýaqyt ishinde ondaǵan keńes, tekserý jáne hırýrgıalyq otalar jasalǵan.
Eske salaıyq, Aýǵanstanda 2025 jylǵy 3 qarashaǵa qaraǵan túni magnıtýdasy 6,3 bolatyn kúshti jer silkinisi tirkelgen edi. Qazaqstan apat saldaryn eńserýge halyqaralyq qoldaý kórsetip, medısınalyq jáne gýmanıtarlyq kómekti júıeli túrde jetkizip otyr.