Almatyda «Halyq qatysatyn byudjet» baǵdarlamasy sáttí júzege asyrylyp keledí. Būl joba tūrǵyndarǵa óz ıdeyalaryn ortaǵa salyp, qalanyń kórkeıíp, abattanuyna tíkeleı atsalysuǵa múmkíndík beredí. Sońǵy úsh jylda megapolıste jalpy qūny 39,1 mlrd. teńgení qūraıtyn 938 joba íske asqan. Al bıylǵy 2025 jyldyń qalalyq byudjetínde baǵdarlamaǵa 17,1 mlrd. teńge qarastyrylǵan.
Ádemí zamanauı skverler
Bíz ótken aptada dál osy joba ayasynda Áuezov audanyndaǵy jańarǵan aumaqtardy aralap qaıttyq. Kórgen sátten-aq baǵdarlamanyń ıgílígín tūrǵyndar sezíníp júrgení anyq baıqadyq. Olar qala basshylyǵyna degen rızashylyqtaryn jasyrmaı aıtyp, alǵystaryn jaudyryp jatty.
Ákímdík qyzmetkerleríníń málímetínshe, OpenBudget portaly arqyly audan tūrǵyndary bírneshe bos aumaqty jasyl sayabaqqa aınaldyruǵa ótínísh bíldírgen. Sonyń bírí – №8 yqshamaudandaǵy Altynsarın kóshesíníń boıyndaǵy №37 úıdíń jany. Būryn qańyrap bos jatqan jer qazír tūrǵyndar demalatyn ádemí zamanauı skverge aınalǵan. Ūzyndyǵy 16 metrlík jaıly oryndyqtar, aınala tolyq jasyl jelekpen kómkerílgen qoǵamdyq keńístíkke gazon tóselíp, ondaǵan aǵash pen būta, kópjyldyq gúlder otyrǵyzylypty. Ádemí jaryq shamdar men beınebaqylau kameralary, qoqys jáshíkterí de qarastyrylǵan. Asfalt pen bruschatka tóselgen seruendeıtín joldar aımaqqa erekshe sán beríp tūr. Al jasyl jelekter úshín ornatylǵan suaru júıesí ondaǵy kógaldyń jyl boıy jasyl kúıín saqtap tūruyna múmkíndík bermek. Būl jūmystar merdíger ūıym – «Sūltan qūrylys» JShS tarapynan jasalǵan kelísím-shart ayasynda júzege asyrylǵan. Búgínde abattandyru jūmystary tolyq ayaqtalyp, nysandardy qabyldap alu sharalary júrgízílíp jatyr.
Audan ákímdígíníń málímetínshe, «Halyq qatysatyn byudjet» jobasy ayasynda qosymsha kógaldandyru sharalary da júrgízílgen. Sonyń nátıjesínde 180-nen astam aǵash pen būta otyrǵyzylyp, 400 dana jasyl qorshau jasaldy. Sonymen qatar, 1200 sharshy metr aumaqqa zamanauı avtosuaru júıesí ornatyldy. Būl jūmystardyń barlyǵy qala ekojúıesín saqtauǵa baǵyttalǵan.
Jańa skverge jıí keletín almatylyqtar aınaladaǵy ózgerísterge dán rıza. Qyzyn emhanaǵa alyp kelgen qala tūrǵyny Saltanat Qashaǵanova em-shara kezínde osy sayabaqta tynyǵyp alatynyn aıtady:
– Mūnda óte jaıly. Ótken jyly kelgenímde būl jerde eshteńe bolmaǵan edí. Qazír jazdyń aptap ystyǵynda sayabaqta otyryp tynyǵuǵa bolady. Qalada osyndaı oryndardyń kóbeyuí bízge úlken quanysh syılaıdy. Būl – bılíktíń tūrǵyndarǵa shyn mánínde qamqorlyq jasap otyrǵanynyń aıǵaǵy, – dedí ol.
Anadaı jerdegí jaıly oryndyqta ūlymen demalyp otyrǵan almatylyq tūrǵynǵa jaqyndap jón sūradyq. Ózín Mıra Qarǵabaeva dep tanystyrǵan ana Áuezov audanyna qarasty №127 mektepte qazaq tílí men ádebıetí páníníń mūǵalímí bolyp qyzmet atqarady. Mūnda ūlymen bírge qydyryp kele jatyp, demalyp otyr eken.
– Būryn būl jer qarausyz, qoqysqa toly bolatyn. Endí bruschatka tóselíp, oryndyqtar qoıylyp, gúlder men aǵashtar otyrǵyzylǵan. Qalamyz jyl ótken saıyn kórkeıíp keledí. Mūndaı ózgerísterdíń barlyǵy qala ákímí Darhan Satybaldynyń eńbegí dep oılaımyn. Almatynyń búgíngí beınesí būrynǵydan múlde bólek. Ár qadam saıyn ásemdík pen tazalyqty kóríp, sheteldík qalalarǵa ūqsaı bastaǵanyna quanamyz, – deıdí Mıra Jeńísqyzy.
Demalys aımaqtary
Audan tūrǵyndarynyń ūsynysy negízínde júzege asqan taǵy bír sáttí jobalardyń bírí – Pyatnıtskıı kóshesíníń boıyndaǵy №86 úı men áskerı mektep arasyndaǵy aumaq. Búgínde adam tanymastaı ózgeríp, zamanauı qoǵamdyq keńístíkke aınalǵan aımaqqa 680 sharshy metr asfalt pen 220 sharshy metr bruschatka tóselíp, balalarǵa arnalǵan túrlí-tústí oıyn alańdary ornatylǵan. Alystan kóz tartatyn 6 trenajer men vorkaut alańy jasóspírímderdíń uaqytyn tıímdí ótkízuge taptyrmas oryn, úlkender tynyǵatyn kóleńkelí oryndyqtar da ádemí ornalastyrylypty. Aınalany kógaldandyru jūmystary da júıelí júrgízílíp, 600 metrlík avtosuaru júıesí tartylǵan.
Osy demalys ornynda bíz áskerı mekteptíń qyzmetkerí Oksana Djarımbetova men Almaty tehnıkalyq baılanys kolledjíníń mamany Qanapıya Aısholpanmen tíldestík. Kúnníń ystyǵyna qaramaı, kóleńkede, terbetíletín oryndyqta áńgímelesíp otyrǵan olar quanyshtaryn jasyrǵan joq.
– Qandaı keremet! Būryn būl jerden jıí ótetínbíz. Qańǵybastar júretín, qarausyz qalady dep oılaıtynbyz. Al qazír qarańyzshy, tura sheteldegídeı bolyp ózgeríptí. Balalar da qauípsíz oınaıtyn alań tapty. Osyndaı oryndar qalamyzda kóp bolsa eken, – deıdí qyzdar shattana.
Tūrǵyndardyń shynaıy quanyshy būl jobanyń qanshalyq mańyzdy árí qajettí ekenín taǵy bír dáleldep berdí.
Qala úshín árbír kógaldandyrylǵan aulanyń, árbír oıyn alańynyń mańyzy zor. Óıtkení, mūndaı ıgílíktí íster tūrǵyndardyń ómír súru sapasyn arttyryp qana qoımaı, qoǵamdaǵy ózara syılastyq pen bírlíktí de nyǵaıtady. Būl bastamalar aldaǵy uaqytta da jalǵasyn tauyp, Almatyny odan árí jaıly da kóríktí qalaǵa aınaldyrary sózsíz.