Japonıyanyń soltústígínde sońǵy ondaǵan jylda bolmaǵan qarly boran saldarynan adam shyǵyny kóbeıíp, tótenshe jaǵdaı ushyǵyp otyr, dep habarlaıdy Aqshamnews.kz tílshísí.
Kúshtí qar jauuynan Japonıya aumaǵynda kóp metrlík qar úıíndílerí paıda bolyp, auyr qaıǵyly oqıǵalar jıílegen. Resmı derekterge sáıkes, tabıǵı apat saldarynan 46 adam qaza tauyp, 558 adam túrlí jaraqat alǵan. Jergílíktí BAQ málímetínshe, keıbír marqūmdardyń denesí bírneshe kún boıy qar astynda qalyp, der kezínde tabylmaǵan.
Japon bılígíníń habarlauynsha, jazataıym oqıǵalardyń basym bólígí ǵımarattardyń shatyrynan qūlaǵan qar massasynyń adamdardy basyp qaluynan bolǵan. Sondaı-aq zardap shekken óńírlerde tūrǵyn úılerdíń opyrylyp qūlaǵany tírkeldí.
Qańtar aıynyń sońynan berí eldíń soltústígínde būryn-sońdy bolmaǵan qarly boran toqtamaı tūr. Aomorı jáne Adjıgasava qalalarynda qar jamylǵysynyń qalyńdyǵy bír metrden asqan. Al keıbír audandarda qardyń bıíktígí 4,5 metrge deıín jetken.
Aomorı prefekturasynyń gubernatory Soıchıro Mıyasıta qala ákímdígíníń kóshelerdí, úılerdí jáne temírjol jelílerín qardan tazalauǵa shamasy jetpeı otyrǵanyn málímdedí. Osyǵan baılanysty aqpan aıynyń basynda japon armıyasynan kómek sūralǵan. Qazír áskerı qyzmetkerler, ásírese, jalǵyzbasty jáne qart adamdarǵa qar tazalau jūmystaryna qolǵabys kórsetíp jatyr.