Jūmysshy mamandyqtar jyly ayasynda tehnıkalyq jáne kásíptík bílím beru júıesí transformatsıyalanuda. Osy jūmystyń negízgí qūraldarynyń bírí - QR Oqu-aǵartu mınıstrlígíníń «Talap» KEAQ ázírlegen tehnıkalyq jáne kásíptík, sondaı-aq orta bílímnen keıíngí bílím beru baǵdarlamalarynyń Reestrí boldy.
Reestr – būl eldegí barlyq kolledj baǵdarlamalary turaly tolyq, ózektí árí senímdí aqparat aluǵa kómektesetín zamanauı tsıfrlyq resurs.
Búgínde Reestrde respublıka kólemíndegí 667 kolledj ūsynǵan 181 mamandyq boıynsha 8 554 baǵdarlama qoljetímdí. Onyń 96%-y tehnıkalyq jáne kásíptík bílím (TjKB) , al 4%-y — orta bílímnen keıíngí deńgeıde. Baǵdarlamalardyń 55%-y memlekettík tílde ázírlengen.
«Bíz árbír bílím beru baǵdarlamasynyń qazírgí eńbek naryǵy talaptaryna saı boluyna erekshe nazar audaramyz», — dedí Tehnıkalyq jáne kásíptík bílím departamentíníń dırektory Áset Mūhanbetov.
Shamamen 2,5 myń baǵdarlama dualdy oqytuǵa baǵyttalǵan, 70 baǵdarlama erekshe bílím beru qajettílíkterí bar jandarǵa arnalǵan. Jambyl ınnovatsıyalyq joǵary kolledjí sheteldík seríktespen bírlesíp (ACCA, Anglıya)
baǵdarlama ázírledí. 139 baǵdarlama basqaru jáne ınjenerlík mamandyqtar klassıfıkatory negízínde qūrastyrylǵan.
Kolledjder eń belsendí túrde ınjenerıya, aqparattyq-kommunıkatsıyalyq tehnologıyalar (AKT), qyzmet kórsetu, bıznes jáne basqaru salalaryndaǵy baǵdarlamalardy daıyndauda. Būl baǵdarlamalardy ázírleu úshín 500-den astam kásíbı standart paıdalanyldy. Baǵdarlamalardy saraptauǵa 540 sarapshy qatysty, olardyń 311-í – pedagog, 229-y – jūmys berushíler.
Jańa oqu jylynda taǵy da 3000 bílím beru baǵdarlamasyn ázírleu josparlanyp otyr.