Jańa Konstıtutsıya jobasy memlekettíń áleumettík sıpatyn kúsheıtíp, sayasattyń ózegíne adamdy qoya otyryp, azamattardyń qoǵamdyq ómírge belsendí qatysu múmkíndígín keńeıtedí, - dep habarlaıdy aqshamnews.kz.
Konstıtutsıyalyq reforma jóníndegí komıssıyanyń kezektí otyrysynda Ata Zań jobasyn qoldau jóníndegí ūstanymy men dáıekterín Jalpyūlttyq sotsıal-demokratıyalyq partıyasynyń tóraǵasy Ashat Rahymjanov málímdedí.
Ol Konstıtutsıya jobasy eń aldymen ádíldíkke, teńdíkke, qūqyqtardy qorǵauǵa jáne memlekettíń halyq aldyndaǵy jauapkershílígín arttyruǵa baǵyttalǵanyn atap óttí.
«Qoǵamdyq bírlestíkterdíń qyzmet etu erkíndígín bekítu jáne azamattardyń qoǵamdyq ómírge qatysu ayasyn keńeıtu – naǵyz azamattyq qoǵamdy damytuǵa jol ashady. Mūndaı qoǵamda kásípodaqtar, qoǵamdyq ūıymdar men bastamashyl toptar eńbek adamdarynyń, jastardyń jáne áleumettík osal sanattaǵy azamattardyń múddelerín erkín qorǵaı alady. Būl – teń múmkíndíkter men memlekettíń áleumettík jauapkershílígí qaǵıdattarymen tíkeleı baılanysty», – dedí JSDP tóraǵasy.
Sonymen qatar, Ashat Rahymjanov osynau konstıtutsıyalyq normalar mańyzy adam múddesíne baǵdarlanǵan ornyqty sayasattyń negízín qalyptastyru úshín mańyzdy ekenín jetkízdí.
«Memlekettík sheshímder qabyldanǵanda bolashaq ūrpaqtyń múddesí míndettí túrde eskeríluí kerek. Ásírese eńbek, jūmyspen qamtu, ekologıya jáne áleumettík qorǵau salalarynda būl óte mańyzdy. Osyǵan baılanysty ūsynylyp otyrǵan konstıtutsıyalyq normalar tūraqty árí adam múddesín basty orynǵa qoyatyn sayasattyń negízín qalyptastyrady», – dep túıíndedí sózín komıssıya múshesí.
