Konstıtutsıyalyq reforma jóníndegí komıssıyanyń 12-shí otyrysynda Qazaqstan Respublıkasy Parlamentí Májílísíníń deputaty, «Respublisa» partıyasy fraktsıyasynyń jetekshísí Aıdarbek Qojanazarov jańa Konstıtutsıya jobasyn qoldaıtynyn málímdedí jáne onyń elímízdíń ary qaraı damuy úshín strategıyalyq mańyzǵa ıe ekenín atap óttí.
«Ūsynylyp otyrǵan Konstıtutsıya jobasy daıyn úlgílerdíń kóshírmesí emes. Iá, bíz halyqaralyq tájírıbení zerdelep, kásíbı qauymdastyqpen keńestík. Alaıda túpkílíktí mátín – derbes tańdauymyzdyń nátıjesí. Ol bízdíń qoǵamnyń qūndylyq negízderín beıneleıdí, tarıhı sabaqtastyqty saqtaıdy árí jańa syn-qaterlerdí eskeredí», – dedí deputat.
Qūjattyń mazmūny turaly toqtalǵan Qojanazarov egemendíktíń ıesí árí bılíktíń bírden-bír bastauy – halyq ekenín atap óttí. Memlekettíń tūraqtylyǵy kelísím men yntymaqqa negízdeledí. Onyń aıtuynsha, bolashaq damu baǵyttary men tsıfrlyq transformatsıyaǵa erekshe kóńíl bólíngen. Sonymen qatar ol basqaru qūrylymyndaǵy ózgerísterge de toqtaldy.
«Bír palataly Parlament – Qūryltaı qalyptastyrylady, onyń baqylau funktsıyalary kúsheıtíledí. Partıyalardyń mańyzy artyp, olardyń qoǵam aldyndaǵy sayası jauapkershílígí kúsheıedí. Būl qadamdar ınstıtutsıonaldyq tepe-teńdíktí qamtamasyz etuge baǵyttalǵan», – dedí fraktsıya jetekshísí.
Sóz sońynda Aıdarbek Qojanazarov jańa Ata Zań ūzaq merzímdí ınstıtutsıonaldyq jańǵyru qūraly ekenín jetkízdí.
«Jalpy alǵanda, jańa Konstıtutsıya – jaı ǵana qūqyqtyq qūjat emes. Būl – ınstıtuttardy jańartuǵa arnalǵan qūral. Bíz ókílettík pen jauapkershílík arasyndaǵy sáıkestík, strategıyalyq jauapkershílík pen qoǵamdyq sením qalypty qaǵıdaǵa aınalatyn, myqty, ádílettí árí tūraqty Qazaqstannyń negízín qalaımyz», – dep túıíndedí ol.