Jambyl oblysynda polıseıler jedel árekettiń arqasynda qaıǵyly jaǵdaıdyń aldyn aldy, dep habarlaıdy Aqshamnews.kz tilshisi.
Oqıǵa 2026 jylǵy 6 qańtarda profılaktıkalyq tekseris barysynda tirkelgen. Jambyl oblystyq polısıa departamentiniń málimetinshe, tártip saqshylary arnaıy esepte turǵan azamattardy kúndelikti aralaý kezinde bir turǵyn úıge kirgen.
Tekserý kezinde polıseıler er adamnyń jatyn bólmede jylytý qubyryna asylyp, ómirine qaýip tónip turǵanyn baıqaǵan. Jaǵdaıdyń kúrdeliligin eskergen quqyq qorǵaý organdarynyń qyzmetkerleri birden áreket etken.
Polıseıler er adamdy dereý bosatyp, alǵashqy medısınalyq kómek kórsetken. Osylaısha, azamattyń ómirin saqtap qalýǵa múmkindik týǵan.
Zardap shekken er adam jedel túrde aýdandyq aýrýhanaǵa jetkizildi. Dárigerlerdiń habarlaýynsha, qazirgi ýaqytta onyń jaǵdaıy turaqty, ómirine qaýip joq.
Qutqarylǵan azamattyń týystary polısıa qyzmetkerlerine kásibı ári beıjaı qaramaǵan áreketteri úshin alǵys bildirgen.
Polısıa departamenti arnaıy esepte turǵan adamdarmen profılaktıkalyq jumystardyń turaqty túrde júrgiziletinin atap ótti. Mundaı sharalar quqyq buzýshylyqtyń aldyn alýǵa jáne qıyn jaǵdaıǵa tap bolǵan azamattarǵa der kezinde kómek kórsetýge baǵyttalǵan.
Mamandar qoǵamdy osyndaı sátterde beıjaı qalmaı, jaqyn jandardyń psıhologıalyq jaǵdaıyna muqıat bolýǵa shaqyrady.