Erjan Qazyhan Qazaqstan Respýblıkasy atynan Amerıka Qurama Shtattarymen ekijaqty yntymaqtastyq máseleleri boıynsha júrgiziletin kelissózderge jetekshilik etedi.
Bul týraly 2026 jylǵy 13 qańtarda Aqordanyń baspasóz qyzmeti málimdedi.
"Memleket basshysynyń ókimimen Jeneva qalasyndaǵy (Shveısarıa) Birikken Ulttar Uıymynyń bólimshesi men basqa da halyqaralyq uıymdar janyndaǵy Qazaqstan Respýblıkasynyń Turaqty ókili Erjan Hozeuly Qazyhanǵa Amerıka Qurama Shtattarymen yntymaqtastyqtyń ózekti máseleleri boıynsha kelissózder prosesindegi Qazaqstan Respýblıkasy Prezıdenti Ókiliniń mindetteri júkteldi", – dep jazylǵan resmı aqparatta.
Erjan Qazyhan 1964 jylǵy 21 tamyzda Almaty qalasynda dúnıege kelgen. Lenıngrad memlekettik ýnıversıtetin bitirgen. Tarıh ǵylymdarynyń kandıdaty.
Dıplomatıalyq qyzmetin 1989 jyly Qazaqstan Respýblıkasy Syrtqy ister mınıstrliginiń Protokoldyq-saıası bóliminde ekinshi hatshy retinde bastaǵan. Keıin osy bólimde birinshi hatshy bolyp qyzmet atqardy. 1992 jyly bólim meńgerýshisi, QR Syrtqy ister mınıstrliginiń Memlekettik protokol basqarmasy bastyǵynyń orynbasary bolyp taǵaıyndaldy. 1995 jyly Qazaqstan Respýblıkasynyń Nú-Iork qalasyndaǵy Birikken Ulttar Uıymy janyndaǵy Turaqty ókildigine birinshi hatshy retinde jiberilip, keıin keńesshi qyzmetine deıin kóterildi.
1999–2003 jyldary Qazaqstan Respýblıkasy Syrtqy ister mınıstrliginiń Kópjaqty yntymaqtastyq departamentiniń dırektory boldy.
2003–2007 jyldary Nú-Iork qalasyndaǵy Birikken Ulttar Uıymy janyndaǵy Qazaqstan Respýblıkasynyń Turaqty ókili, sonymen qatar Kýbadaǵy Qazaqstannyń elshisi qyzmetin qosa atqardy.
2007–2008 jyldary Qazaqstan Respýblıkasy Syrtqy ister mınıstriniń orynbasary boldy.
2008 jyly Qazaqstan Respýblıkasy Prezıdentiniń kómekshisi qyzmetin atqardy.
2009–2011 jyldary Avstrıadaǵy Qazaqstan Respýblıkasynyń elshisi jáne Vena qalasyndaǵy halyqaralyq uıymdar janyndaǵy Turaqty ókil boldy.
2011 jyly Qazaqstan Respýblıkasy Syrtqy ister mınıstriniń orynbasary qyzmetin atqardy.
2011–2012 jyldary Qazaqstan Respýblıkasynyń Syrtqy ister mınıstri boldy.
2012–2014 jyldary Qazaqstan Respýblıkasy Prezıdentiniń kómekshisi qyzmetin atqardy.
2014–2017 jyldary Erjan Qazyhan Ulybrıtanıa men Soltústik Irlandıa Birikken Koróldigindegi Qazaqstan Respýblıkasynyń elshisi, sondaı-aq qosa atqarý tártibimen Irlandıa men Islandıadaǵy elshi boldy.
2017–2021 jyldary Amerıka Qurama Shtattaryndaǵy Qazaqstan Respýblıkasynyń elshisi qyzmetin atqardy.
2021–2022 jyldary Qazaqstan Respýblıkasy Prezıdentiniń halyqaralyq yntymaqtastyq jónindegi arnaıy ókili boldy.
2022–2023 jyldary Qazaqstan Respýblıkasy Prezıdenti Ákimshiligi basshysynyń orynbasary – Prezıdenttiń halyqaralyq yntymaqtastyq jónindegi arnaıy ókili qyzmetin atqardy.
2023 jylǵy qyrkúıekten bastap Birikken Ulttar Uıymynyń Jenevadaǵy bólimshesi men ózge de halyqaralyq uıymdar janyndaǵy Qazaqstan Respýblıkasynyń Turaqty ókili bolyp taǵaıyndalǵanǵa deıin Prezıdenttiń halyqaralyq máseleler jónindegi kómekshisi boldy.
Dıplomatıalyq dárejesi – Tótenshe jáne Ókiletti Elshi.