Taǵy 191 tūrǵyn úıdí gazǵa qosuǵa tehnıkalyq múmkíndík jasalmaq, dep habarlaıdy aqshamnews.kz tílshísí.
Almatyny gazdandyru deńgeıí 99,6%-ǵa jettí. Degenmen qalada jańa jelí salmaıynsha, tabıǵı gazǵa qosyla almaıtyn úıler álí de bar. Aldaǵy jyldary gaz ınfraqūrylymyn keńeıtu josparlanyp otyr: taǵy 191 tūrǵyn úıdí gazǵa qosuǵa tehnıkalyq múmkíndík jasalmaq. Ol úshín shamamen 10,7 shaqyrym gaz jelísín salu qajet. Qalanyń gazben qamtyluyn damytu, qosylu qūny men áleumettík tūrǵyda osal tūrǵyndarǵa kórsetíletín kómek turaly Almatynyń Óńírlík kommunıkatsıyalar qyzmetínde ótken brıfıngte «QazaqGazAimaq» AQ Almatylyq óndírístík bólímshesí men Almatynyń Energetıka jáne sumen jabdyqtau basqarmasynyń mamandary aıtyp berdí.
Olardyń málímetínshe, Almatynyń basym bólígí gazben jabdyqtau júıesímen qamtylǵan. Qalanyń túrlí audanyndaǵy jeke úılerge, áleumettík jáne kommertsıyalyq nysanǵa gaz qosuǵa tehnıkalyq múmkíndík bar. Alaıda úıdíń janynda gaz qūbyrynyń boluy avtomatty túrde úıdíń íshíne gaz tartylady degendí bíldírmeıdí. Menshík ıesí ol úshín tehnıkalyq shartty alyp, jobany ázírletíp, qūrylys-montaj jūmysyn júrgízuí kerek.
Sonymen qatar qalada gazǵa qosylu úshín aldymen gaz taratu jelísín saluǵa tura keletín jekelegen úıler men tūrǵyn alaptar bar. Būl máselení 2027–2031 jylǵa arnalǵan Investıtsıyalyq baǵdarlamanyń ayasynda sheshpek.
«QazaqGaz Aimaq» AQ Almatylyq óndírístík bólímshesí Óndírístík-tehnıkalyq bólímíníń bastyǵy Aıbek Qasymovtyń aıtuynsha, baǵdarlamaǵa qazírgí tańda qajettí ınfraqūrylymy jetkílíksíz mekenjaılar engízílgen.
«2027–2031 jylǵa arnalǵan Investıtsıyalyq baǵdarlama ayasynda shamamen 191 tūrǵyn úıdí gazǵa qosuǵa tehnıkalyq múmkíndík jasalady. Ol úshín shamamen 10,7 shaqyrym gaz taratatyn jelí salu qajet. Mekenjaılar tízímí tūrǵyndardyń ótíníshí men jergílíktí atqarushy organdardyń málímetí boıynsha jasaldy. Būl jūmysty qarjylandyru da ınvestıtsıyalyq baǵdarlama ayasynda qarastyrylyp qoıylǵan», – deıdí Aıbek Qasymov.
Jeke úıge gaz kírgízudíń qansha tūratyny da tūrǵyndardyń kókeıíndegí bír sūraq. Almatyda gazǵa qosyludyń bíryńǵaı tarıfí joq. Sondyqtan aumaǵy bírdeı ekí úıdíń ózínde qorytyndy soma ózgeshe boluy múmkín. Qūny gaz qūbyryna deıíngí aralyqqa, jūmystyń qıyndyǵyna, jelíní jol nemese basqa da ınjenerlík kommunıkatsıya arqyly júrgízu qajettílígíne, jūmsalatyn jabdyqqa, jerdí qazu men keıín qalpyna keltíruge baılanysty.
Sonymen qatar tūrǵyndar bírneshe qyzmettí tegín alady. «QazaqGaz Aimaq» AQ-nyń Almaty fılıaly tehnıkalyq sharttardy bergení úshín aqy almaıdy. Qoldanystaǵy gaz taratu jelísíne bastapqy qosu men gazdy alǵashqy ret íske qosu da tegín júrgízíledí.
Menshík ıesíníń negízgí shyǵyny jobalau, jabdyq satyp alu men qūrylys-montaj jūmysyna baılanysty. Būl jūmysty mamandandyrylǵan kompanıyalar ísteıdí. Qolda bar málímetke sáıkes, Almatyda qazír osyndaı 80-nen astam ūıym jūmys ísteıdí eken, olar baǵany da ózderí qoyady.
«QazaqGaz Aimaq» AQ Almatylyq óndírístík bólemshesíníń satu men gazben jabdyqtau rejımí qyzmetíníń bastyǵy Narıman Hasenov qosylu protsesíníń bír bólígín qashyqtan júrgízuge bolatynyn aıtty.
«Tehnıkalyq shartty eGov nemese eGov mobile qosymshasy arqyly onlaın aluǵa bolady, būl qyzmet tegín. Odan keıín menshík ıesí jobany ázírleıtín, qajettí jūmysty júrgízetín mamandanǵan ūıymdy tańdaıdy. Búkíl protsestí tolyq «bír tereze» qaǵıdaty boıynsha ótu múmkín emes, bíraq qazír rásímníń bír bólígín elektrondyq formatqa kóshírdík», – deıdí Narıman Hasenov.
Janynda gaz qūbyry bar, bíraq túrlí sebeppen tūrǵyndary oǵan álí qosylmaǵan úıler de bar. «QazaqGaz Aimaq» kompanıyasy mūndaı nysandardyń naqty sanyn atamaıdy: bólímshe jūmysty óz tūtynushylarynyń esebín júrgízedí, alaıda Almatydaǵy gazdandyrylmaǵan úılerdíń barlyǵyn qamtıtyn bíryńǵaı baza qalyptastyrmaıdy.
Sondyqtan naqty qansha úıdíń gazsyz otyrǵanyn, olardyń qaı jerde ornalasqanyn jáne tūrǵyndardyń nelíkten qosylmaı otyrǵanyn anyqtau úshín qalalyq bíryńǵaı túgendeu júrgízu qajet. Mamandar yqtımal sebeptíń qatarynda eń aldymen jobaǵa, jabdyq pen montaj jūmysyna ketetín shyǵyndy atap otyr. Bíraq qazír tūrǵyndardyń qanshasy dál osy baǵaǵa baılanysty gazǵa qosyludan bas tartatynyn kórsetetín jeke zertteu joq.
Spıkerler Almatyda áleumettík osal tūrǵyndarǵa arnalǵan arnauly kómek baǵdarlamasy jūmys ísteıtínín atap óttí. Baǵdarlama qala ákímdígí, «Halyq» áleumettík baǵdarlamalardy qoldau qory men Halyk Bank bírlesíp júzege asyrady. Qosylu «kíltke deıín» qaǵıdaty boıynsha júrgízíledí: baǵdarlama jabdyqtar men qūrylys-montaj jūmysyna ketetín shyǵyndy óteıdí.
Almatynyń Energetıka jáne sumen jabdyqtau basqarmasynyń jylu jáne gazben jabdyqtau bólímíníń basshysy Nūrlan Ábdualı mūndaı qoldaudyń óz qarajatyna úıín gazdandyruǵa múmkíndígí shekteulí otbasylardyń máselesín sheshuge múmkíndík beretínín aıtady.
«Almatyda áleumettík osal toptarǵa tabıǵı gazǵa «kíltín bergenge deıín» qaǵıdaty boıynsha qosyluǵa arnalǵan baǵdarlama jūmys ísteıdí. Ol baǵdarlamaǵa qatysushylardyń jabdyq pen qūrylys-montaj jūmysyna ketetín shyǵyndaryn tolyq óteudí kózdeıdí. Íríkteu krıterıılerí, tízímderdí qalyptastyru men 2026 jyly qosylatyn úılerdíń sany osy baǵdarlamany íske asyru ayasynda aıqyndalady», – dedí Nūrlan Ábdualı.
Mamandar gaz qūbyryna óz betínshe qosyluǵa qatań tyıym salynatynyn da eske salady. Tehnıkalyq sharttar alynǵannan keıín jobalau men montaj jūmysyn qajettí rūqsaty men lıtsenzıyasy bar ūıymdar júrgízuí tıís. Ár úıdí gazǵa qosu merzímí de jeke belgílenedí. Tehnıkalyq sharttar berílgennen keıín joba ázírleníp, montaj jūmysy men qabyldau rásímí júrgízíledí. Osydan keıín ǵana gazdy alǵash ret íske qosuǵa bolady.
Osylaısha, qazírgí 99,6% qamtu deńgeıínde Almaty úshín negízgí míndet endí audandardy jappaı gazdandyru emes, qalǵan úılerdí gazǵa qosyp, ázírge tehnıkalyq múmkíndík joq jerlerge jelí salu bolyp otyr.
Infraqūrylymdy keńeıtudíń kelesí kezeńí 2027–2031 jylǵa josparlanǵan, būl qaladaǵy gazben qamtudy tolyq deńgeıge jetkízuge sep boluy tıís.