Mamyr aıynan bastap Qazaqstanda bírqatar mańyzdy ózgerís kúshíne enedí. Jańashyldyqtar qarjy naryǵy men tsıfrlyq aktıvterdí retteuden bastap, avtokólík ımporty, salyqtyq baqylau, bílím beru, turızm jáne mádenı sharalarǵa deıíngí salalardy qamtıdy. Tolyǵyraq aqshamnews.kz tílshísí tarqatady.
Tsıfrlyq aktıvter men krıptovalyuta tolyq retteledí
1 mamyrdan bastap Qazaqstan tsıfrlyq aktıvter men krıptovalyuta naryǵyn tolyqqandy qūqyqtyq retteuge kóshedí. Būǵan deıín būl sala íshínara ǵana rettelse, endí tsıfrlyq aktıvter qarjy jáne qūqyq júıesíne engízíledí.
Negízgí jańalyq – krıptovalyuta men ózge de tsıfrlyq aktıvter zań júzínde tauar retínde tanylady. Yaǵnı olar múlík pen satyp alu-satu mámíleleríne qatysty jalpy erejelerge baǵynady. Endí tsıfrlyq aktıvterge baılanysty dauly máselelerdí sot arqyly sheshuge bolady.
Bıtkoın jáne basqa da krıptoaktıvter resmı túrde mámíle nysanyna aınalady. Krıptobırjalar, aıyrbastau punktterí jáne krıptoqyzmet kórsetetín ūıymdar Ūlttyq bankten lıtsenzıya aluy kerek.
Olarǵa klıentterdí sáıkestendíru, bıometrıyalyq tekseru, operatsıyalardy baqylau jáne retteushíge esep beru míndetí júkteledí. Qazaqstan aumaǵynda krıptovalyutamen jasalatyn resmı operatsıyalar endí anonımdí bolmaıdy.
Krıptovalyuta aıyrbastau operatorlary aı saıyn ár aıdyń 10-na deıín óz platformalaryndaǵy satyp alu jáne satu operatsıyalary turaly esep beruge míndetteledí.
Zeınetaqy júıesín jańartu máselesí qaralady
Mamyr aıynyń ayaǵyna deıín Úkímet janyndaǵy jūmys toby zeınetaqy júıesín jańartu boıynsha ūsynystardyń bírín tańdauǵa tıís.
Qazír bírneshe nūsqa qaralyp jatyr. Sonyń bírí – «4+1» júıesí. Būl model boıynsha jūmys berushíníń míndettí zeınetaqy jarnasynyń 4 paıyzy qyzmetkerdíń jeke zeınetaqy shotyna, al 1 paıyzy ortaq zeınetaqy shotyna audarylady.
Taǵy bír ūsynys boıynsha zeınetke shyǵu jasy emes, eńbek ótílí negízgí ólshem boluy múmkín. Būl rette eńbek ótílí kemínde 40 jyl boluy kerek degen ūsynys aıtylǵan.
Úshínshí nūsqa – saqtandyru zeınetaqysy. Ol zeınetaqy annuıtetíne ūqsas jūmys ísteuí múmkín.
Metall synyǵy men mūnaı ónímderín shyǵaruǵa shekteu qoıylady
1 mamyrdan bastap el aumaǵynan qara metall synyqtaryn, paıdalanylǵan metall qaldyqtaryn, sondaı-aq mys, alyumınıı, qorǵasyn jáne qūramynda qorǵasyn, kadmıı nemese synap bar materıaldardy shyǵaruǵa jarty jylǵa tyıym salynady.
Sonymen qatar benzın, dızel jáne basqa da mūnaı ónímderín elden shyǵaruǵa tyıym taǵy alty aıǵa ūzartyluy múmkín. Būl shekteu 21 mamyrdan 21 qarashaǵa deıín áreket etuí yqtımal.
Sūıytylǵan mūnaı gazy, propan men butandy elden shyǵaruǵa da shekteu ūzartyluy múmkín. Eger tıístí qūjat kúshíne ense, tyıym 14 mamyrdan bastap taǵy jarty jylǵa sozylady.
Mobıldí audarymdar boıynsha habarlamalar kele bastaıdy
Mamyr aıynda salyq organdary mobıldí audarymdarǵa qatysty tekseru qorytyndysy boıynsha habarlamalar jíbere bastaıdy.
Alaıda būl barlyq azamatqa qatysty emes. Habarlama tek úsh shart qatar oryndalǵan jaǵdaıda ǵana keledí:
Bírínshíden, jeke tūlǵanyń shotyna 100 jáne odan kóp adamnan audarym túsuí kerek. Ekínshíden, mūndaı audarymdar úsh aı qatarynan jasaluǵa tıís. Úshínshíden, audarymdardyń jalpy somasy 1 mln teńgeden asuy qajet.
Eger osy belgíler anyqtalsa, azamattarǵa kameraldyq baqylau habarlamasy joldanady. Ony 30 kún íshínde oryndau qajet.
Áskerı qyzmetshílerge jańa talap engízíledí
4 mamyrdan bastap kelísímshart boıynsha áskerı qyzmetke kíretín azamattarǵa qatysty jańa talap kúshíne enedí.
Olar tabys ákeletín múlkín 30 kún íshínde senímgerlík basqaruǵa beruge míndettí. Alaıda aqsha, oblıgatsıyalar, kommertsıyalyq kompanıyalardyń aktsıyalary jáne jalǵa berílgen múlík būl talaptan bosatylady.
Endí ánshíler fonogrammamen án aıtpas būryn eskertuge míndetteledí
2 mamyrdan bastap mádenı-būqaralyq ís-sharalardy ūıymdastyrushylar men oryndaushylar fonogramma qoldanylatyny turaly kórermenge aldyn ala habarlauǵa míndetteledí.
Būl aqparat afıshalarda, bılet satylatyn oryndarda jáne jarnamalarda kórsetíluge tıís. Teledıdar men radıodaǵy jarnamada fonogramma turaly eskertu kemínde 5 sekund aıtyluy kerek.
Balyq aulauǵa shekteu qoıylady
Mamyr aıynda Qazaqstannyń kóptegen óńírínde balyqtyń uyldyryq shashu kezeńíne baılanysty balyq aulauǵa shekteu engízíledí.
Tyıym ár basseın men óńír boıynsha ártúrlí merzímde qoldanylady. Mysaly, Balqashtyń batys bólígínde, Qaratal, Aqsu, Lepsí, Ayagóz ózenderínde 15 sáuírden 1 mausymǵa deıín balyq aulauǵa bolmaıdy. Syrdarıya men Kíshí Aral aumaǵynda shekteu 1 sáuírden 10 mausymǵa deıín áreket etedí.
Kaspıı teńízíníń qazaqstandyq sektorynyń soltústík bólígínde tyıym 25 mamyrdan 31 tamyzǵa deıín sozylady.
Oqushylar úshín sońǵy qońyrau erterek ótedí
Bıyl Qazaqstan mektepterínde sońǵy qońyrau ádettegíden erterek ótuí múmkín. Sebebí oqu jylynyń dástúrlí ayaqtalu kúní – 25 mamyr jeksenbíge sáıkes keledí.
Sondyqtan 11-synyp túlekteríne arnalǵan saltanatty jıyndar mektep ákímshílígíníń sheshímímen 23 nemese 24 mamyrda ótkízíledí.
Bílím salasynyń ókílderí sońǵy qońyrau saltanatyn artyq shusyz ótkízuge shaqyrady. Ata-analar men oqushylarǵa qymbat merekelík sharalar, kólíkpen seruendeu, aqsha jınau sıyaqty beıresmı formattarǵa jol bermeu eskertíldí.
Bírínshí synypqa qūjat qabyldau merzímí ózgerdí
Bıyl bírínshí synypqa ótínísh qabyldau 1 sáuírden emes, 27 mamyrdan bastalady. Qūjattar 31 tamyzǵa deıín qabyldanady.
Būl sheshím qabyldau nauqany men oqu jylynyń ayaqtalu kezeńí bír uaqytqa túsíp qalmauy úshín qabyldanǵan. Al belgílí bír mektepte mektepaldy dayarlyqtan ótken balalar bírínshí synypqa avtomatty túrde qabyldanady.
Negízgí ŪBT bastalady
Negízgí ŪBT 10 mamyrda bastalyp, 10 shíldege deıín jalǵasady. Bıyl test formaty ózgermeıdí. Talapkerler úsh míndettí pán jáne tańdaǵan ekí beıíndík pán boıynsha emtıhan tapsyrady. Jalpy sūraq sany – 120.
«Nauryz 2026» baǵdarlamasy boıynsha ótínísh beru ayaqtalady
Otbasy bank «Nauryz 2026» baǵdarlamasyna qatysa alatyn 16 myń salymshynyń tízímín jarıyalaǵan. Olar 6 sáuírden 12 mamyrǵa deıín nesıege ótíním beruí kerek.
Ótíním maqūldansa, qatysushylarǵa baspana ízdep, satyp alu úshín 6 aı uaqyt beríledí. Kezekte tūrǵan azamattardyń bír bólígí 7 paıyzdyq mólsherlememen ıpoteka ala alady.
Almatyda mamyr aıynda kezekte tūrǵan 1 myńnan astam tūrǵynǵa páter kíltí tabystalmaq. Baǵdarlama sharttary boıynsha ıpoteka mólsherlemesí – 5 paıyz, bastapqy jarna – 10 paıyz.
Jańa áue reısterí ashylady
1 mamyrdan bastap koreyalyq Eastar Jet loukosterí Almatydan Pusanǵa tíkeleı reısterdí qaıta bastaıdy. Ūshaqtar aptasyna ekí ret qatynaıdy.
Al Asiana Airlines 4 mamyrdan bastap Almaty – Seul baǵyty boıynsha reıster sanyn aptasyna úshten beske deıín arttyrady.
Úlken qajylyq bastalady
Bıyl qajylyq 15 mamyr men 5 mausym aralyǵynda ótedí. Qazaqstandyq qajylardy Air Astana, SCAT jáne saudıyalyq Flyadeal áue kompanıyalary tasymaldaıdy.
Reıster Almaty, Astana jáne Shymkentten Jıdda men Mádına qalalaryna tíkeleı oryndalady.
Mamyrdaǵy mádenı jáne sporttyq sharalar
Mamyr aıynda Qazaqstanda bírneshe írí mádenı jáne sporttyq shara ótedí.
16 mamyrda Almatydaǵy Ortalyq stadıonda, 17 mamyrda Astanada Solana muzykalyq festıvalí ótedí. Onda Busta Rhymes, Tyga, Flo Rida, Timbaland, Nicole Scherzinger jáne basqa da álemdík jūldyzdar óner kórsetedí.
20 mamyrdan bastap Jetísu oblysy Tekelí qalasy mańynda Jetisu Paraglide paraplaner sporty boıynsha álem jáne Azıya chempıonaty ótedí. Oǵan 40-tan astam elden sportshylar qatysady.
9–11 mamyr aralyǵynda Almaty oblysynda Tengri Ultra halyqaralyq treıl jarysy ótedí. Al 15–17 mamyr kúnderí Astanada Counter-Strike 2 oıyny boıynsha PGL Astana kıbersport turnırí ūıymdastyrylady.
Mamyrda qazaqstandyqtar 14 kún demalady
Bıyl mamyr aıynda bes kúndík jūmys aptasymen jūmys ísteıtín qazaqstandyqtar 14 kún demalady. Al alty kúndík jūmys aptasynda 12 demalys kúní bolady.
1 mamyr – Qazaqstan halqynyń bírlígí kúní. Būl kún jūmaǵa sáıkes kelgendíkten, qazaqstandyqtar 1, 2 jáne 3 mamyr kúnderí demalady.
7 mamyr – Otan qorǵaushy kúní. Būl kún beısenbíge túsetíndíkten, qazaqstandyqtar taǵy bír kún demalady.
9 mamyr – Jeńís kúní senbíge sáıkes keledí. Sondyqtan demalys kúní dúısenbíge auystyrylyp, 9, 10 jáne 11 mamyr demalys bolady.
27 mamyr, sársenbí kúní Qūrban aıt merekesíne baılanysty da demalys beríledí.
Bıyl Astanada Otan qorǵaushy kúní men Jeńís kúníne arnalǵan auqymdy áskerı parad ótkízílmeıdí. Onyń ornyna qalalarda kontsertter, áskerı tehnıka kórmelerí, dalalyq ashana jáne ardagerlerge arnalǵan ís-sharalar ūıymdastyrylady.