Qazaqstanda Qorǵas torabynda júk jáne jolaýshylarǵa arnalǵan jańa áýejaı salynady, dep habarlaıdy Aqshamnews.kz tilshisi.
Saýda jáne ıntegrasıa mınıstri Arman Shaqqalıevtiń aıtýynsha, Qazaqstan–Qytaı shekarasyndaǵy Qorǵas torabynda SkyHansa júk-jolaýshylar áýejaıy boı kóteredi. Ol habty damytýdyń negizgi elementine aınalyp, óńirdiń ótkizý qabiletin aıtarlyqtaı arttyrýǵa múmkindik beredi.
Mınıstrdiń málimetinshe, shekarada Qytaımen birlesken tolyqqandy logıstıkalyq keshen qurylyp jatyr. Jańa áýejaı tranzıtti kúsheıtip, júk aǵyndarynyń kólemin ulǵaıtýǵa jáne jańa baǵyttar ashýǵa jol ashady.
Qazirgi ýaqytta «Qorǵas – Shyǵys qaqpasy» AEA aýmaǵynda 64 qatysýshy tirkelgen. Jalpy quny 58,6 mlrd teńge bolatyn 32 ınvestısıalyq joba júzege asyrylyp, shamamen 2 300 jumys orny qurylǵan. İri jobalar qatarynda qazaqstan-qytaı ónerkásiptik qalasy, jel energetıkalyq qondyrǵylar men energıa saqtaý júıelerin óndiretin zaýyt, metal buıymdary óndirisi, sondaı-aq kofe jáne shaı sýsyndary zaýyty bar.
Sonymen birge habtaǵy logıstıkalyq ınfraqurylym aýqymdy jańǵyrtýdan ótip jatyr: «Khorgos Gateway» termınaly 18 temirjol jelisine deıin keńeıtilip, Qytaıdyń erkin ekonomıkalyq aımaǵymen tikeleı logıstıkalyq dáliz qurylyp jatyr. Sarens kompanıasynyń óndiristik-logıstıkalyq kesheni men bondtyq qoımalar da salynyp jatyr.
Arman Shaqqalıevtiń aıtýynsha, Qorǵas toraby Qazaqstan men Qytaı arasyndaǵy ózara saýda men ekonomıkalyq yntymaqtastyqty kúsheıtetin mańyzdy býynǵa aınalyp, shekarada turaqty ındýstrıalyq orta qalyptastyrýǵa yqpal etpek.