Medıtsına qyzmetkerlerí kúní qarsańynda Astanada elímízdíń densaulyq saqtau salasynyń úzdík ókílderín memlekettík jáne salalyq marapattarmen marapattau rásímí óttí, dep habarlaıdy aqshamnews.kz.
Jalpy 68 medıtsına salasynyń qyzmetkerí «Barys», «Parasat», «Dostyq», «Qūrmet» ordenderímen, sondaı-aq «Eren eńbegí úshín», «Shapaǵat» medaldarymen marapattaldy.
Sondaı-aq, ís-shara barysynda «Kásíbíníń úzdígí» respublıkalyq baıqauynyń jeńímpazdary anyqtaldy. Dárígerler, medbıkeler, farmatsevter jáne densaulyq saqtau júıesíníń basqa da mamandary kásíbı sheberlígí, janqıyarlyǵy men mamandyǵyna adaldyǵy úshín marapattaldy.
Saltanatty sharaǵa qatysushylarǵa Qazaqstan Respublıkasy Premer-Mınıstríníń orynbasary Ermek Qosherbaev pen Densaulyq saqtau mınıstrí Aqmaral Álnazarova qūttyqtau sóz sóıledí.
«Búgín bíz Qazaqstannyń densaulyq saqtau júıesíníń eń tańdauly ókílderín – «Kásíbíníń úzdígí» baıqauynyń jeńímpazdaryn marapattap otyrmyz. Būl jandar kún saıyn adam ómírín qūtqaryp, densaulyǵyn qalpyna keltíríp, joǵary kásíbılíktí jáne óz ísíne adaldyqty kórsetíp júr. Barsha jeńímpazdardy shyn júrekten qūttyqtaı otyryp, halyqqa kórsetken qyzmetterí úshín árqaısyńyzǵa alǵysymdy bíldíremín», – dedí Ermek Qosherbaev.
Búgíngí tańda elímízdíń densaulyq saqtau júıesínde 378 myńnan astam adam eńbek etedí. Onyń íshínde 271 myńnan astamy – medıtsına qyzmetkerlerí, shamamen 81 myń dáríger men 190 myń orta buyn mamandary bar. Būdan bólek, salanyń eńbek ūjymy qūramynda kíshí medıtsınalyq personal, menedjerler, áleumettík qyzmetkerler, ınjenerler jáne basqa da mamandar bar.
Densaulyq saqtau mınıstrí Aqmaral Álnazarova memleket medıtsına mamandyǵynyń tartymdylyǵyn arttyryp, kásíbı ortany qolaıly etuge júıelí túrde kúsh salyp jatqanyn atap óttí.
– Bıylǵy jyldyń bes aıynda densaulyq saqtau mamandary 1,4 mıllıonǵa juyq nauqasqa statsıonarlyq kómek kórsettí, onyń íshínde 399 myńnan astamy – balalar. 445 myńnan astam ota jasalyp, sonyń íshínde 8,4 myńnan astamy – joǵary tehnologıyaly operatsıyalar. 80 myńnan astam nauqas ońaltu kursynan óttí, al ambulatorıyalyq-emhanalyq jaǵdaıda 3 mıllıonnan astam ońaltu qyzmetí kórsetíldí. 2025 jyldyń basynan bastap emhanalarda 163 mıllıonnan astam adam qabyldandy, jedel járdem qyzmetí 2,7 mıllıonnan astam shaqyrtuǵa bardy. Akusherler 132 myńǵa juyq anany bosandyrdy, – dedí mınıstr.
Prezıdent Qasym-Jomart Toqaev medıtsına qyzmetkerleríníń qoǵamdaǵy rólí men mártebesíníń mańyzdylyǵyn únemí atap ótedí. 2024 jyly Memleket basshysy medıtsına qyzmetkerleríníń áleumettík mártebesí men qūqyqtyq qorǵaluyn arttyruǵa baǵyttalǵan zańǵa qol qoıdy. Kásíbı saqtandyru júıesí engízíldí. Sonymen qatar, auyldyq jerlerge kadr tartu jūmystary jalǵasyp jatyr: 2023 jyldan bastap auylǵa tapshylyǵy joǵary mamandyqtar boıynsha kelgen dárígerlerge 100 AEK (shamamen 8,5 mln teńge) kólemínde bír rettík tólem, tūrǵyn úıge jeńíldetílgen nesıe, kóterílu járdemaqysy jáne jalaqysyna ústeme aqy qarastyrylǵan.
Saladaǵy úzdík mamandardy marapattau – medıtsına qyzmetkeríníń joǵary mıssıyasyn, yaǵnı ūlt saulyǵynyń kúzetínde tūru, úmít pen ómírdí saqtap qalu jolyndaǵy erlígín eske salar mańyzdy sát. Būl mereke – tek mamandyqtyń ǵana emes, aq halatty abzal jandardyń erlígí men janashyrlyǵyna kórsetílgen zor qūrmet.
