Qazaqstanda Astana Hub ūıymdastyrǵan tehnologıyalyq jobalarǵa arnalǵan ūlttyq startap-batl - Digital Qazaqstan Battle óńírlík jartylaı fınaldary ayaqtaldy, – dep habarlaıdy aqshamnews.kz tílshísí.
Baıqau qorytyndysy boıynsha óz óńírlerín tanystyryp, sheshímderín Shymkent qalasynda ótetín Digital Qazaqstan forumy sahnasynda ūsynatyn 20 fınalıst anyqtaldy.
Óńírlík jartylaı fınaldardyń qorytyndysy boıynsha Digital Qazaqstan Battle fınalyna 20 startap óttí. Olardyń qatarynda: aitomaton (Qostanaı), Lady Taxi (Atyrau), SanEduPortal (Semeı), Kasibi Taxi (Oral), LoyaBonus (Óskemen), Okushy (Kókshetau), CortexAI (Qyzylorda), Proji (Aqtóbe), zhihaz.kz (Qonaev), SmetaHub (Jezqazǵan), gro.now (Almaty), Reco (Taraz), AR Sana (Astana), Qalam (Shymkent), Ai-mektep (Túrkístan), JolScan (Qaraǵandy), Mathlab (Pavlodar), Help Hand (Taldyqorǵan), KenDala (Aqtau) jáne Numerus (Petropavl).
«Digital Qazaqstan Battle – myqty tehnologıyalyq jobalar tek írí qalalarda ǵana emes, Qazaqstannyń óńírlerínde de paıda bolatynyn kórsetuge múmkíndík. Jartylaı fınaldar barysynda bíz daıyn ónímderí bar, alǵashqy satylymdaryn júzege asyrǵan jáne halyqaralyq naryqtarǵa shyǵudy kózdeıtín startaptardy kórdík. Shymkentte ótetín fınal olardyń eń úzdíkteríne óz sheshímderín ınvestorlarǵa jáne eldíń búkíl tehnologıyalyq ekojúıesíne tanystyruǵa múmkíndík beredí», – dedí Astana Hub basqarushy dırektory Tanat Óskembaev.
Óńírlík batldardyń jeńímpazdarynyń bírí – jol ınfraqūrylymynyń jaı-kúıín monıtorıngteu jáne kompyuterlík kóru tehnologıyalary arqyly avtotūraq keńístígín basqaru sheshímín ázírleıtín JolScan startaby. Júıe qalalyq kameralar men mobıldí qūrylǵylardan jınalǵan derekter negízínde jol jabynyndaǵy aqaulardy avtomatty túrde anyqtaıdy. Būl joldardy qolmen tekseruge ketetín shyǵyndardy aıtarlyqtaı azaıtuǵa múmkíndík beredí.
«Jartylaı fınalda jeńíske jetu – jol ınfraqūrylymyn monıtorıngteu men avtotūraq keńístígín basqarudy bír ekojúıege bíríktíretín “aqyldy qala” tūjyrymdamamyzdyń ómírsheńdígín rastaıdy. Bíz úshín būl qoldanystaǵy qalalyq ınfraqūrylymdy mobıldí sensorlar retínde paıdalanu sıyaqty ınnovatsıyalyq tásíl qalalardy tsıfrlyq transformatsıyalaudyń tıímdí qūraly bola alatynyn kórsetedí», – dedí JolScan startabynyń teń qūryltaıshysy Rustem Qadyrov.
Óńírlík kezeńníń taǵy bír jeńímpazy – aitomaton startaby. Ol AI-agentterdíń kómegímen bıznes-protsester men kommunıkatsıyalardy avtomattandyruǵa arnalǵan platformany ázírleude.
«Bíz bıznes úshín AI-agentter men adamdardy bír jūmys keńístígínde bíríktíretín platformany jasap jatyrmyz. Onda negízgí qūraldar bíríktírílgen: CRM, task-treker, qyzmetterge jazylu júıesí, omnıkanaldy messendjer, telefonıya jáne qońyraular men chattarda jūmys ísteıtín AI-agentter. Digital Qazaqstan Battle fınalyna shyǵu – būl tūjyrymdamany keń tehnologıyalyq audıtorıyaǵa tanystyruǵa tamasha múmkíndík. Fınalda úzdík úshtíkke eníp, jobany damytu úshín jańa seríktester tabudy josparlap otyrmyz», – dedí aitomaton jobasynyń CPO jáne negízín teń qalaushy Edgar Volodkın.
Eske sala ketsek, ūlttyq startap-batldyń fınaly 2026 jylǵy 27 nauryzda Shymkent qalasynda Digital Qazaqstan forumy ayasynda ótedí. Fınalıster óz jobalaryn qazylar alqasyna, ınvestorlarǵa jáne eldíń tehnologıyalyq ekojúıesíníń ókílderíne tanystyrady.
Batl jeńímpazy 10 000 000 teńge, ekínshí oryn ıegerí 5 000 000 teńge, úshínshí oryn ıegerí 3 000 000 teńge alady. Sonymen qatar 1 000 000 teńge kólemínde kórermen kózaıymy júldesí tabystalady. Qazylar alqasy jobalardy naryqtyq dınamıkasy, komanda sapasy, masshtabtalu áleuetí jáne ınvestıtsıyalyq tartymdylyǵy boıynsha baǵalaıdy.