2023-2025 jyldary Qazaqstanda «Keleshek mektepterí» ūlttyq jobasy ayasynda 460 myńnan astam oqushy ornyna arnalǵan jańa formattaǵy 217 mektep salyndy, – dep habarlaıdy aqshamnews.kz tílshísí.
Jańa mektepter oqu oryndaryndaǵy oryn tapshylyǵy máselesín sheshuge, qoldanystaǵy mektepterge túsetín júktemení azaıtuǵa jáne júzdegen myń balaǵa qolaıly bílím alu jaǵdaıyn qamtamasyz etuge múmkíndík beredí.
Jobanyń íske qosylǵany turaly Qazaqstan Respublıkasynyń Prezıdentí Kasym-Jomart Tokaev alǵash ret 2022 jyly «Ádílettí memleket. Bírtūtas ūlt. Berekelí qoǵam» atty Joldauynda málímdegen bolatyn. Sol kezde Memleket basshysy orta bílím sapasy tabysty ūlt qalyptastyrudyń mańyzdy faktory ekenín atap óttí.
Jobanyń negízgí míndetí - oqu oryndaryna sūranys joǵary qalalar men qarqyndy damyp jatqan eldí mekenderde jańa formattaǵy mektepter salu. Barlyq mektepter zamanauı jabdyqtarmen jáne negízínen otandyq óndírístíń jıhazdarymen qamtamasyz etílgen.
Qala men auyl mektepterí arasyndaǵy alshaqtyqty azaıtuǵa erekshe kóńíl bólíndí. Jańa nysandardyń jartysyna juyǵy auyldyq jerlerde ornalasqan. Būl balalardyń tūrǵylyqty jeríne qaramastan sapaly bílímge teń qol jetkízuíne múmkíndík beredí.
Jańa formattaǵy mektepter zamanauı sáuletímen jáne tıímdí josparlanǵan ınfraqūrylymymen erekshelenedí. Olardyń jalpy audany tıptík mektep ǵımarattarymen salystyrǵanda 15-20 paıyzǵa keń, al tehnıkalyq jabdyqtalu deńgeıí tórt ese joǵary. Óńírlerdíń qajettílígíne qaraı joba ayasynda 300-den 2500 orynǵa deıíngí ártúrlí syıymdylyqtaǵy mektepter salu qarastyrylǵan. Būl rette aumaqtardyń klımattyq jáne ınfraqūrylymdyq erekshelíkterí eskeríldí.
Jobanyń mańyzdy baǵyttarynyń bírí - ınklyuzıvtí bílím berudí damytu. Erekshe bílím beru qajettílíkterí bar balalar úshín arnaıy kabınetter men jeke sanıtarlyq bólmeler qarastyrylǵan. Ǵımarattarda lıftíler, pandustar jáne navıgatsıyalyq kórsetkíshter ornatylǵan, sondaı-aq psıholog, logoped jáne defektolog kabınetterí jūmys ísteıdí. Sonymen qatar mektep qūrylysy tájírıbesínde alǵash ret ár blokta oqushylar men pedagogterge arnalǵan demalys aımaqtary qarastyryldy.
Qauípsízdík máselesíne de erekshe nazar audaryldy. Mektepter zamanauı beınebaqylau júıelerímen jabdyqtalǵan, olardyń beınesí jedel basqaru ortalyqtaryna shyǵarylady. Sonymen qatar dabyl túımelerí, dybystyq habarlau júıelerí, esíkterdí avtomatty túrde būǵattau júıesí jáne lıtsenzıyalanǵan kúzet qyzmetí qarastyrylǵan.
Jańa formattaǵy mektepterdegí tárbıe jūmysy «Adal azamat» tūlǵany qalyptastyru baǵdarlamasynyń qaǵıdattaryna negízdelgen. Bílím beru ortasy qoǵam damuyna úles qosuǵa daıyn, jauapty, adal árí bastamashyl azamat tárbıeleuge baǵyttalǵan.
Osylaısha, «Keleshek mektepterí» ūlttyq jobasy sońǵy jyldardaǵy bílím beru salasyndaǵy eń írí ınfraqūrylymdyq bastamalardyń bíríne aınaldy. Jańa mektepter zamanauı bílím beru ortasyn qalyptastyryp, eldíń adamı kapıtalyn damytuǵa berík negíz qalaıdy.