Almatyda qala ákimi Darhan Satybaldynyń tóraǵalyǵymen «Taza Qazaqstan» ekologıalyq baǵdarlamasyn júzege asyrýǵa qatysty keńes ótti. Naqty nátıjeler, qalalyq ortany jaqsartý boıynsha júıeli sharalar jáne komýnaldyq qyzmetterden bastap qala turǵyndaryna deıin úderiske qatysatyndardyń barlyǵynyń jeke jaýapkershiligin arttyrý talqylandy.
Keńes barysynda qalanyń segiz aýdanynda sanıtarlyq tazalaý, abattandyrý jáne ekologıalyq aǵartý jumystary qorytyndylandy. Aýanyń lastanýyn tómendetýge, kólik jáne óndiris oryndaryn baqylaýǵa, ózender men kanaldar arnalaryn tazartýǵa, sondaı-aq turaqty jasyl qordy qalyptastyrý jónindegi praktıkalyq sharalarǵa erekshe nazar aýdaryldy.
Darhan Satybaldy «Taza Qazaqstan» - bul bir rettik aksıa emes, barlyq taraptyń tártipti, baqylaýdy jáne kópshilikti jumyldyrýdy talap etetin uzaq merzimdi saıasat ekenin atap ótti. Ol qaladaǵy tazalyq pen tártip esep berýmen emes, kúndelikti sheshimderden - basqarý deńgeıinen, ár aýla men kireberistegi tazalyqtan bastalatynyn aıtty.
Kún tártibi boıynsha turǵyndarǵa qalalyq ortanyń túıtkildi máseleleri týraly tikeleı habarlaıtyn TazaQazBot onlaın-platformasynyń jumysy qaraldy. Ákim sıfrlyq quraldar statısıkaǵa emes, nátıjege jumys isteýi tıis ekenin atap ótip, jedel keri baılanystyń mańyzdylyǵyn jáne azamattardyń ótinishterine nemquraıly qaraýǵa bolmaıtyny aıtty.
Keńestiń jeke blogy baǵdarlamany aqparattyq súıemeldeýge arnaldy. Jıynǵa qatysýshylar túsindirý jumystarynyń tıimdiligin, bul iske jurtshylyqty, jastar men bıznesti tartýdy, sondaı-aq qalalyq ortada ekologıalyq mádenıet pen jaýapty minez-qulyqty qalyptastyrý jónindegi is- sharalardy talqylady.
Keńes qorytyndysy boıynsha beıindi basqarmalar men aýdan ákimdikterine naqty tapsyrmalar berildi. Vedomstvoaralyq ózara is-qımyldy kúsheıtýge, ekologıalyq talaptardyń oryndalýyn júıeli baqylaýǵa jáne birrettik is-sharalardan turaqty sheshimderge naqty kóshýge basa nazar aýdaryldy.