Almaty qalasynyń ákímí Darhan Satybaldy Ekologıya máselelerí jóníndegí vedomstvoaralyq komıssıyanyń otyrysyn ótkízíp, onda 2026–2027 jyldarǵa arnalǵan atmosferalyq aua sapasyn jaqsartu jóníndegí Jol kartasynyń íske asyrylu barysyn qarady, – dep habarlaıdy aqshamnews.kz tílshísí.
Jol kartasy 13 baǵyt boıynsha keshendí sharalardy qamtıdy jáne aua lastanuyn tómendetuge júıelí tásíl qoldanudy kózdeıdí.
Otyrys barysynda qala ákímí 2-JEO men 3-JEO-ní tabıǵı gazǵa kóshíru, tómen emıssıya aımaǵyn (LEZ) pılottyq rejımde engízu, kólíktí ekologıyalandyru, qalalyq aumaqtardy kógaldandyru jáne ózge de sharalardyń oryndalu barysy turaly aqparatty tyńdady.
Jeke tūrǵyn úı sektoryn gazdandyru máselesíne erekshe nazar audaryldy. Qala ákímí ártúrlí mekemeler ūsynǵan málímetter arasynda aıyrmashylyq bar ekenín atap ótíp, gaz jelísíne qosylmaǵan tūrǵyn úılerge tolyq túgendeu júrgízudí tapsyrdy. Sondaı-aq gazǵa qosylu qūnyn bírízdendíru tetígín ázírleu jáne áleumettík osal sanattaǵy azamattardyń úılerín gazǵa qosu jūmystaryn jandandyru míndetín júktedí.
Búgínde Almaty aglomeratsıyasy aumaǵynda 18 myńnan astam jeke tūrǵyn úı álí kúnge deıín gazdandyrylmaǵan. Osyǵan baılanysty Energetıka jáne sumen jabdyqtau basqarmasyna Almaty oblysyndaǵy áríptesterímen bírlesíp, olardy kezeń-kezeńímen gazdandyru jóníndegí naqty ís-sharalar josparyn ázírleu tapsyryldy.
Qala ákímí «Eco Almaty» monıtorıngí derekteríne sáıkes tekserílgen 2100 shaǵyn jáne orta bıznes nysanynyń, onyń íshínde avtoservısterdíń, qoǵamdyq tamaqtanu oryndary men monshalardyń shamamen 30 paıyzy qatty otyndy paıdalanatynyn atap óttí.
«Kásípkerlermen jūmysty kúsheıtíp, gazǵa kóshu men súzgí júıelerín ornatuǵa jeńíldetílgen nesıeleu tetíkterín qarastyru qajet. Kommunaldyq tehnıkany ekologıyalandyru jūmystary jetkílíksíz júrgízílude, eskí avtokólíkterdí satyp alu tetígí de pysyqtalmaǵan. Jalpy alǵanda, Jol kartasynyń oryndalu tıímdílígí tómen, naqty nátıje kórínbeıdí. Sondyqtan būl baǵyttaǵy jūmysty kúsheıtu qajet», – dedí Darhan Satybaldy.