Tıramısu, nutella, chızkeık, pudıng, balmūzdaq. Būl tízímdí jalǵastyra beruge bolady. Eger būl ataular sízge jaqsy tanys bolsa, demek táttíní jaqsy kóretínder qatarynansyz nemese kondıter ónímderíne qatysy bar maman bolǵanyńyz.
1 aqpan – Halyqaralyq desert kúní. Táttíní jaqsy kórmeıtín adam kemde-kem bolar. Al eger joǵaryda atalǵan tízímnen bírde-bíreuín tanymasa, onda táttíge esh áues emes jandar qatarynan bolǵany. Desert búgínde álemníń kez kelgen elínde damyp, neshe túrí shyǵyp ketken. Árbír kondıterlík ónímníń ózíníń shyǵu tarıhy, sebebí, típtí arnaıy kúnderí bar bolar. Degenmen táttí ónímderdí bíríktíretín bír kún bar. Ol – aqpannyń bírínshí jūldyzy, yaǵnı búgín.
Būl beıresmı data jáne ol ınternet jelísín paıdalanushylar arqasynda tanylyp keledí. Táttíqūmarlar arasynda būl kúndí qalaı atap ótu kerektígí jónínde ortaq píkír álí de qalyptaspaǵan bolar. Keıbírí būl kúndí 12 qarasha kúní, al endí bíreulerí 1 aqpan kúní atap ótedí. Calend.ru saıynyń málímetínshe, ekínshí datanyń paıda boluy AQSh- ta bloger árí kondıter Endjı Dadlıdíń jasaǵan keık-pop desertíníń keń tanyla bastauymen baılanysty. Keık-pop 2008 jyly keńínen tanylyp, moıyndaldy.
Uaqyt óte kele desert kúníníń naqty datasy belgílenetín bolar.
Būndaı kúndí atap ótu, ásírese, balalar úshín zor quanysh shyǵar. Aınalańyzǵa jaqsy kóńíl-kúı syılauǵa jomart adam bolsańyz, mūndaı kúnderí olardy da ūmytpaǵan jón.
Táttíní tym kóp jeu zıyan deseńíz, qūramyn barynsha paıdaly etíp ázírlep nemese tapsyrys beríp, kíshkentaılardy nemese jaqyndarymyzdy quantuǵa sebep tauyp, osy kúní qūttyqtasa bolady. Dofamın gormony túsíp, kúızelísten sharshaǵan adamdarǵa da ózderín jaqsy sezínu úshín búgín – jaqsy sebep. Degenmen, táttíníń zıyandy jaǵy da bar ekenín eskeríp, shekten shyqpaı, densaulyǵyna zıyan kelmeıtíndeı mólsherde azdap táttí torttan jese, aıyby bolmas.
Kóńíldí júru úshín kúnde táttí jep, ol úshín mereke jasau da míndet emes. Degenmen, ózgeníń kóńílín kóteríp, janyn jadyratar jan úshín būl taptyrmaıtyn sebep. Táttíge qaramaı jadyrap júretín adamdardyń dastarhanynda kúnde mereke.