92 kelide aıqasqa túsken Aıbek Oralbaı qarsylasyna ese jiberdi
Serbıa astanasy Belgrad qalasynda ótip jatqan bokstan álem chempıonatynda 31 qazanda jeńiske jetken úsh qazaqstandyqtyń shırek fınaldaǵy qarsylastary anyqtaldy, dep habarlaıdy Almaty-akshamy.kz QazAqparat agenttigine silteme jasap.
Aıta ketsek, keshe el quramasynan Mahmýd Sabyrhan (54 keli) men Samatálı Tóltaev (60 keli), Aslanbek Shymbergenov (71 keli) jarysty jalǵastyrýǵa múmkindik aldy.
Qazaqstandyqtar sapynan endi Mahmýd Sabyrhan brazılıalyq Maıkl Trınıdadpen qolǵap túıistiredi.
Mahmýd buǵan deıin Ońtústik Koreıadan kelgen In Kú Kımdi, odan keıin shotlandıalyq Mettú Makheıldy jeńdi.
Taǵy bir boksshymyz Samatálı Tóltaev fransıalyq Sofán Ýmıamen kezdesedi.
Samatálı buǵan deıin taılandtyq Hýnatıp Pıdných jáne kolýmbıalyq Dývan Sýleta Moreno tize búktirdi.
Al Aslanbek Shymbergenov endi ýkraınalyq Iýrıı Zaharevpen qolǵap túıistiredi.
Aslanbek budan buryn ıran boksshysy Farhad Moradı Atashgahty, ózbek sportshysy Shahram Gıasovty, germanıalyq Magomed Shahıdovty orta jolda qaldyrdy.
Álem chempıonaty 6 qarashada máresine jetedi.
Al, 92 kelide aıqasqa túsken Aıbek Oralbaı qarsylasyna ese jiberdi. Ol ózbekstandyq Madıar Saıdrahımovpen sheberlik baıqasty.
Birinshi raýndta Aıbek qarsylasyn bir márte nokdaýnǵa jiberip úlgerdi. Ekinshi raýndta onyń ózi nokdaýnǵa túsip qaldy. Úshinshi raýnd teń dárejede ótti. Nátıjesinde Madıar Saıdrahımov jarysty jalǵastyrýǵa múmkindik aldy.
Aıbek buǵan deıin polshalyq Mateýsh Bereznıskıdi jeńgen bolatyn.